Liverpool neitute hi an chi ai tur a ni lo - Rick Parry
Merseyside club Liverpool chief executive hlui Rick Parry chuan tuhnaia an result chhiat vang maia chi ai lo turin Liverpool neitu te chu a fuih.
Hull City laka 1-0 a tlawm zo hlim Liverpool tan season thara Champions League beiseina a chau tawh hle a, hei hian thuthang lengvel a tih tam phah hle.
Kum 2009 thleng Anfield-a chief executive hnathawk Parry chuan, "Chak tak leh huai taka awmin nghet takin ding rawh u. In thiltumah ding nghet tlat ula, thil holam mai mai in in rilru ti chi ai suh se," tiin Liverpool neitu American Fenway Sports group te chu a fuih.
FA Premier League hotupa ber pawh lo ni tawh Rick Parry chuan, "Season hmasa a kan khelh dan nen tehkhin chuan kan khel chhia tih hi phat rual a ni lo. Mahse, cup semi-final pahnih lutin Champions League pawh beisei bo tawp a ni lo a, khel chhe lutuk a sawi tur chu kan nilo a ni," a ti.
Hmanni lawka Liverpool enkawl tura a ṭhat ber thu sawitu Brendan Rodgers chu chhanin Parry chuan, "Thawklehkhata ropui thut turin Rodgers hi beisei suh u. Chutiang chu thil theih pawh a ni lo. Mahse, Liverpool ang club ropuiah hi chuan mipui min thlirna pawh a sangin trophy chawi ngei turin min duh ṭhin a ni," a ti.