Kan champion ngei kan ring - Sangpuia, BCA coach

Samsung 3:16 Plan Solution Mizoram Super League final boruak a ngaihnawm a, Khatla TBL leh Zarkawt BCA te an inhlau lo tawn ve ve.

Khatla TBL-in MSL-a Zarkawt BCA an tawn hmasak ber ṭumin 64-61 in an hneh hram a, H. Laldinsanga chu hero a ni. An intawn vawi hnihnaah BCA-in player pawiamwh HT Vanlalremruata leh Albert Lalramchuana te an chhawr thei lo a, 78-67 ngawtin TBL an chak a, TBL coach/player Mapuia'n point 30 khungin a langsar hle.

BCA tan champion turin Mapuia dah ṭhat a pawimawh a, Saron Veng tlangval hmaah BCA guard Michael F. Lalawmpuia a pawimawh dawn. School khata lut ṭhin Mapuia leh Michael F-a te hi rilru takin an inngam a, guard pahnih che vel hi a hmuhnawm ang.

Khatla TBL-in R. Lalmalsawma, Gospel Lalthawmmawia, Vanlal­muana leh Nelson Lalrohlua te an kawl avangin an defence a ṭha a, BCA tan Dennis Lalmuanpuia, Zorinsanga, Jackson Lalrintluanga leh David Lalruatfela te ṭum dang aia an chet ṭhat a pawimawh ang.

TBL-in ring hnuaia che turin Darliansanga an nei a, BCA lamin ring hnuai aṭanga game thlak thei an nei lo. Amaherawhchu Zarkawt bigman R. Lafakawma dah hniam ngawt a thiang lo, league pressure leh final pressure a dang daih dawn a. League-a che ṭha TBL hi pressure nei ngah zawk tur an ni.

BCA coach R. Lian­sangpuia chuan, "Kan huphurh lo a, kan champion ngei kan ring. BCA chuan engpawh thleng se hming phuah chhan Biakchunga tan kan hlan. Kan player-te hian training an ngai pawimawh a, an inpekna hi ka fak thlawt a ni. Final hmuhnawm tak mipui hmuh tir ngei kan tum," tiin a sawi.

Vanglaini palaiin TBL coach/player Mapuia hnenah 'Hman aṭanga tun thlengin player ṭha ber i la ni zel a, Mizoram basketball-ah hmasawnna a awm lo ami?' tiin zawhna a siam a; Mapuia chuan, "Ka teammate-te zarah ka lang mawi mai a ni. Mizoram baksetball-ah hian hmasawnna hmuh tur a tam," tiin a sawi.

Mapuia chuan final chungchang sawi zuiin, "Pressure a tam dawn a, hetiang hun hi kan thiamna tak tak lantirna hun a ni. League-ah a sang berah kan awm a, team ṭha ber kan ni tih lantir tawh. Champion hi kan hmabak a ni," a ti.

Lawmthu sawiin TBL coach chuan, "Player chhungte chungah kan lawm takzet a, min ṭawi­awmna zara hetiang dihmun thleng thei hi kan ni," tiin a sawi.