MSL Final-ah India star Pratham Singh

Mizoram Super League Season 1 ṭan khan Khatla TBL-in an squad-ah India team-a tel pha Pratham Singh leh Amjyot Singh an ziak lut a. League stage-ah player ṭha pahnih hi hmuh tur an awm lo a, final-ah feet ruk leh inches hniha sang Pratham a inlan dawn.

Pratham hi Punjab-ah a piang a, a nu leh pate hnathawhna Chhattis­garh-ah a khawsa ṭhin thung. Kum 11 a nih aṭangin basketball a khel ṭan a; Punjabi player-te hi an talent avangin an lar a, Chhattisgarh hi grassroots training ṭhat an hming than pui thung. Hei vang hian Pratham hi India player pawimawh a ni thei hi a mak lo. Punjabi tlangval hi Indian Overseas Bank, Tamilnadu tan a khel mek.

Kum 2004 khan India Youth Team aiawhin Russia-ah an zin a, hemi hnu hian China, Kazakhstan, Malaysia, Iran, Hong Kong, Indo­nesia leh Qatar te a tlawh zui bawk. TBL coach/player H. Laldinsanga nen India tan Youth leh Junior team-ah an awm ho a, senior team-ah Mapuia hi a lut hma zawk.

TBL coach/player Mapuia chuan, "Champion tum vang hrim hrim a Pratham chah lut hi kan ni lo. Kan lak luh chhan zawk chu Mizo naupangte hian India team tana khelh hi a theih a ni tih hre ve se kan duh. Final-ah Pratham hi kan hmu ngei dawn a, a tih ang hi Mizote hian kan theih lohna awm lo," tiin Mizo ṭhalaite tan chona a siam.

Pratham Singh vangin Zarkawt BCA an zam phah lo. BCA assistant coach Lalruatfela chuan, "India player pawh ni se match khat lekah nghawng a nei thei lo. Kan chak lo a nih chuan Mizo player-te vang chak lo kan ni ang," a ti.

Hawla Indoor Stadium-ah India player a inlar dawn a, hmuh hmaih phal chi a ni lo ang.