Lonestar hneh lotu Aizawl FC dinhmun a phet

I League Second Division a tawp hnai a, inelna a nung thar hle. Nimin inkhelah a sang pali zingah hmahruaitu Aizawl FC chiah an chak lo a; Lonestar Kashmir FC, Chanmari FC leh Mohammedan SC-te nen hmun ­ruak pakhat an inchuh chhunzawm zel dawn.

PTC Stadium Dergaon-ah Aizawl FC leh Lonestar Kashmir FC ten first half-ah goal an khung lo a, second half-ah Lonestar tan Ajay Singh chuan goal hnih a khung a, 2-0 in an chak. Punjab forward Ajay hian goal 12 khung tawhin top scorer a ni mek.

Lonestar-in MPL3 cham­pion point hmuh zat chiah hmu mah se head to head-a ṭha zawk Aizawl FC pakhatna an ni chhunzawm.

Aizawl FC coach K. Mal­sawmkima chuan, "Entu kan neih ṭhat ber ṭuma kan chak lo hi a pawi kan ti hle. Lonestar an khel ṭha zawk a, chak an phu. Hmahruaitu kan la ni tho a, I League khelh ngei kan tum. Min ṭantute ṭawngṭaipuina kan ngen a, min ṭawiawm tawhnaah kan lawm takzet a ni," tiin a sawi.

Chanmari FC-in Lalding­ngheta leh Patrick Arol Enondji te hmangin first half-ah goal an khung a, second half-ah Joel Sunday-a'n goal thumna a khung lehin an dinhmun a ṭha hle. Amaherawhchu United SC-in goal hnihin an chhang let a, a tawpah Chanmari FC an ṭang tluan thei hram. MPL2 champion-in Kolkata club 3-2 in an hneh.

Chanmari FC coach H. Vanlalthlanga chuan, "A tawp thleng ṭhak theihtawp chhuahin kan khel ang. A bak chu Pathian kutah a awm. Team boruak a ṭha a, hriselna ṭha tak kan nei bawk," tiin team dinhmun a sawi.

Inkhel dangah Mohamme­dan SC-in Somide Adelaja leh Ashim Biswas te goal hmangin PIFA Sports 2-0 in an hneh a; Hindustan FC leh Kenkre Sports te 2-2 in an inhnehtawk bawk.

Engtin Zel?

Aizawl FC khelh hmabak hi Kenkre Sports, Chanmari FC leh Mohammedan SC te an ni a, an chak vek chuan I League an khel dawn.

Aizawl FC-in Kenkre an khel tur hi insiamṭhatna hun ṭha a ni a, Chanmari FC an hneh thei a nih chuan Mohammedan SC an hmachhawn meuh chuan Kolkata club hian beisei an nei tawh dawn lo a, khelh an awlsam sawt ang.

Chanmari FC hi pathum­naah awm mah se midang kutah an awm bik lo; Hindustan FC, Aizawl FC leh Lonestar an hneh vek chuan I League an khel dawn.

Lonestar hi pahnihna ni chung siin an dinhmun a ṭha hle. An khelh hmabak PIFA Sports leh Kenkre Sports lakah point ruk an hlawhchhuah ngei a rinawm. Amaherawhchu match tawp berah Chanmari FC an hmachhawn dawn.