Player kim lo Arsenal an chak lo
Arsenal chu tun season Premier League khelh laiah a vawi khat nan an chak lo. Mikel Arteta naute hi Bournemouth khelmualah 2-0 in an chak lo, defender William Saliba hnawhchhuah a nih avangin Gunners an che hleithei lo.
Inrinni zan inkhelah hian Ryan Christie leh Justin Kluivert te chuan goal khat ve ve an khung. Arsenal lamin a chhanletna tur an nei lo, league match vawi riat an khelha an chak lohna hmasa ber ni mah se, vawi hnih dang inhnehtawk an nei tawh bawk.
Gunners chak lo
Vitality Stadium-ah Arsenal hi inringtawk takin an lenglut a, international match khel zo hlim an ngah bakah hliam tenau nei dam hlim an awm nual avangin chak chiangsa a dah ngawt theih chu an ni bik lo.
Minute 30-naah William Saliba a chesual, France international hian Bournemouth striker Evanilson a tih tluk avangin hnawhchhuah a ni - Leandro Trossard ball pet fuh loh chinfel a tumna lamah Saliba hi a chesual.
An kim loh hnuah Gunners hian goal khung theihna remchang tak nei mah se, forward Gabriel Martinelli chuan goalkeeper Kepa Arrizabalaga chauh a hmachhawn tawhah a khung lo, hnai tak aṭanga a pet chu a lo dansak.
Hun tawp dawn lamah Bournemouth an chefuh, corner aṭanga ball kal chu mawi taka inpein substitute Christie chuan chet angreng tak karah a khung a, hun tawp dawnah Kluivert chuan penalty aṭangin an chak a nemnghet bawk a ni.
Arsenal leh red card
Tun season Premier League match riat an khelh tawh a, heng aṭang hian Arsenal player pathum hnawhchhuah an ni tawh. Bournemouth hma hian Manchester City leh Brighton lakah kim lo chungin an lo khel tawh bawk.
Declan Rice leh Leandro Trossard ten red card an hmuh ṭum pawhin point khatah an lungawi a ngai a, tun ṭumah erawh point an hlawh chhuak zo ta lo, team nem zawk laka chetsual hi champion tum tan a pawi thui thei ang.
Gunners manager Arteta chuan, "Premier League-ah chuan minute 60 aṭanga 70 chhung vel kim loa khelh chuan hnehna chan a harsa a ni, tun ṭuma thil thleng kha chu tihpalh a ni tih ka sawi duh bawk.
"Match pathumah hnawhchhuah kan tawk tawh a, chung inkhelah chuan a nghawng vek bawk," a ti a, player kim loa khelh harsa a tih thu a sawi a, chutihrualin player thunun leh thluak an hman kawnga fimkhur turin a chah a ngai ve bawk a ni.
Harh a ngai
Bournemouth laka William Saliba an hnawhchhuahna kha chu sawi buai zui vak theih a ni lo, defender Saliba kha goalkeeper David Raya tih lohah chuan player awm hnung a ni a, anmahni lama lut tur a dan avangin hrem tur a ni.
Match hmasa lama Rice leh Trossard an hnawhchhuahna erawh pumpelh theih tur a ni a, an khingpui lamin freekick an pet tur tih khawtlai vang a ni a, dan hmanga hrem theih an ni si - club dang an hrem lo tih ngawt khan a chhan thei lo.
Tun hai Premier League season riat chhunga champion team zingah, season tluana red card hmu pathum nei tling an awm ngai lo, player pathum hnawhchhuah chunga champion thei hnuhnung chu Leicester City (2015-16) kha an ni.
Arsenal hian tun season kal laiah pawh Man City leh Liverpool te an elpui a ni leh dawn, anni team pahnih hian hnawhchhuah an tawk ngai meuh lo. An champion kumah chuan player pahnih aia tamin red card an hmu ngai lo hial - champion tum tan chuan harh a ngai e!