Kolkata derby-a ropui zawk Mohun Bagan
Indian football fixture-a ngaihven hlawh bera chhal ngam, khawvel huap pawha derby 'hot' tling pha, Kolkata derby chu Inrinni zan khan khelh a ni a, Indian Super League inkhel boruak sangah Mohun Bagan chu 2-0 in an chak.
Bagan tan Jamie Maclaren leh Dimitrios Petratos (penalty) ten goal khat ve ve an khung a, East Bengal-in a chhanletna tur an neih loh avangin an tlawm - Kolkata club hi match nga an khelh tawhah an la tlawm vek a, Hyderabad FC nen tun season ISL-a chak la nei ve miah lo club an ni.
Kartawp inkhel dangah Bengaluru FC chuan 1-0 in Punjab FC an hneh a, tun season-ah tlawm an la nei lo tluang zel. Hetihlai hian tun season-a a vawi khat nan Mumbai City an chak ve bawk a, khualmualah FC Goa chu 2-1 in an hneh.
Derby chu
East Bengal-in nipui transfer-ah sum an hmang hnem a, an hmelma Bagan defender Anwar Ali an chhuhsak danah phei chuan hremna an tawk hial. Mahse, khelmual pawna an chet ṭhat hi khelmualah an chhawm thei lo a, ISL-ah chak a la nei lo tluang zel.
Kolkata club hian result ṭha beiseiin Carles Cuadrat an ban a, Bangladesh football-a coach langsar Oscar Bruzon an la lut. Mahse, Spanish coach hnuaia an match hmasa berah Bagan an mikhual nghal a, an tlawm.
Bagan tan Jamie Maclaren chuan minute 41-naah goal hmahruai a khung a, hun tawp nan minute khat chiah a awm tawh tihah Dimitrios Petratos chuan penalty hmangin a khung ve leh bawk - East Bengal an tlawm.
Mizo inlan
David Lalhlansanga'n tun season ISL-a a vawi khat nan inkhel bul a ṭan a, Vairengte tlangval hian minute 45 a khel - coach thar Oscar Bruzon hnuaiah hmun pawimawh chan chhunzawm zel a beisei ang. Defender Lalchungnunga leh Mark Zothanpuia te chu bench aṭangin an lut bawk.
East Bengal hi tun season ISL-a point la nei lo awmchhun an ni a, anmahni ang thoa chak nei lo Hyderabad hian match thum chiah an la khel a, annin match nga an khel tawh thung. Hyderabad hian zanin dar 7:30-ah Jamshedpur an lenchilh ang.
Mohun Bagan tan dan pangngaiin Lalengmawia Ralte (Apuia) chuan inkhel bul a ṭan a, Vaivakawn tlangval hi Bagan tan midfield-ah ban nghet leh player pawimawh a ni - Apuia an la lut hi an inchhir lo tawlh tawlh ang!
Bengaluru an kal zel
ISL match nga zet chu a zawnin Bengaluru an tlawm ta lo. Zirtawpni zan khan tun season-a anmahni ang thoa tlawm la nei lo Punjab FC an mikhual a, Roshan Singh chuan inkhela goal awmchhun a khung - Chinglensana Singh chu second half-ah hnawhchhuah ni mah se, Bengaluru an tlawm phah lo.
Bangalore club hian tun season-ah goal an la chhuah miah lo a, ISL-a season ṭantir aṭanga goal chhuah lo rei ber (481 minutes) an siam - Jamshedpur-in 2017-18 season-a an lo siam tawh 389 minutes chu an khum a, record ropui an siam zanah Lalremtluanga Fanai chu bench aṭangin a lut ve bawk.
Mumbai City-in 2-1 in Goa an hneh a, Nikalos Karelis leh Yoell van Niff ten first half-ah goal khungin, Goan club tan second half-a Armando Sadiku (penalty) goal khungin awmzia a nei phak lo - Mumbai tan Lallianzuala Chhangte leh Hmingthanmawia Ralte (Valpuia) ten minute 90 an khel tluan.