Mizoram an chak lo, beisei a tlem

29th Senior Women's National Football Championship for Rajmata Jijabai Trophy 2024-25-ah Mizoramin chuan October 19, Inrinni khan match hmasa berah Jharkhand 1-0 in an hneh lo a, knockout stage luh a harsa dawn.

Group H-ah Mizoram hi Jharkhand leh Telangana nen an awm ho a, group khat aṭangin pakhat chauhin quarterfinal an lut dawn. Zanin dar 6:00 hian Mizoramin Kanchenjunga Stadium, Siliguri-ah Telangana an hmachhawn leh ang.

Inrinni zan inkhelah Jharkhand an chungnung hret a, chutihrualin B. Malsawmzuala kaihhruai Mizoram team an ṭang thei hle. Mahse, minute 59-naah Mizoram tlarhnung an muthlu a, Sunita Munda-i'n box chhung aṭangin ṭha zetin a pet goal a, Jharkhand tan goal pawimawh a khung.

Mizoramin goal an chhuah hnuah nawr tumin Lalsangpuii Sailo, Imanuel Malsawmtluangi leh Sandra Beipieso Notlia te luhtir mah se chance ṭha insiam an harsat a, chance ṭha an insiam theih loh avangin goal an khung thei ta lo.

Sawmtea kaihhruai Mizoram team tana quarterfinal beiseina chhi nung turin Telangana hneh ngei a ṭul dawn a, attacking football an khelh a ṭul ang.