A zawna hattrick siamtu Messi

Argentina tana goal thum a khung hnuah a club Inter Miami tan Lionel Messi chuan hattrick a siam leh nghal. Nimin zing khan New England lakah a team hi 6-2 in a chakpui.

Major League Soccer (MLS) regular season-ah Inter Miami hian match 34 aṭangin point 74 an hmu a, regular season bika point hmu hnem ber record an siam - Messi hian Miami tan goal 33 a khungsak a, club tana khung tam ta ber a ni bawk.

Chase Stadium-a inkhelah hian Luis Suarez a hmuhnawm lehpek hle bawk - Uruguay international hlui hian goal hnih a khung bakah Messi-a goal pahnih hi a siamsak a ni bawk a, Barcelona lama an khelh pui ṭhin Jordi Alba chuan assist vawi hnih a nei ve thung.

Inter Miami tan thu lawmawm dang a thlang zui bawk - MLS club hi FIFA Club World Cup khel turin an tling nghal, team 32 inelna hi nakkum June 15 aṭanga July 3 chhungin United States-ah khelh a ni ang.

FIFA president Gianni Infantino chuan, "Khawvela club ṭha berte zinga mi an ni a, chuvangin Inter Miami hi an thil tih leh hlenchhuah avangin Club World Cup 2025 khel turin an tling," a ti.