Ten Hag-a'n United la enkawl dawn

Goal an phurh hmasak zet hnuah Manchester United chuan Brentford chu 2-1 in an hneh let a, ban mai theih dinhmuna ding an coach Erik ten Hag-a chunga boruak rit lutuk pawh an thawi dam rih deuh tura ngaih a ni.

Old Trafford-ah inkhel entu 73,738 an pungkhawm a, goal nei hmasa zawk chu mikhual Brentford an ni. Bees tan Ethan Pinnock chuan chawlhlawk hma chiahin corner aṭanga ball kal a tauh lut.

Goal luh lai hian Man United defender Matthijs de Ligt chu a lua hliam enkawl vangin khelmual sirah a la awm, an player ṭha luhtir mai loa corner an pet avangin Ten Hag a lawm lo, card pek ngai khawpin a sawisel hial.

Dutch manager hian chawlhlawk laiin a naute a fuih ṭha tih a lang, first half an khelh laia hlauhawm thei tak Alejandro Garnacho a che fuh ta - Argentine forward hian Marcus Rashford-a ball pek chu lei a thlen hmain a lo pet lut.

Man United an hmuhnawm zui a, striker Rasmus Hojlund chuan a dam ṭha ta hle tih chu goal hmangin a lantir. Bruno Fernandes-a ball pek a umlut a, keeper Mark Flekken rawn tlan chhuak deuh mah se Denmark international hian a lo 'chip' khum keuh.

Manchester United manager Ten Hag chuan, "Hnehna kan chan avanga lawm hun a ni. Second half-ah khan kan inpumkhatna leh hnehna chan chaka kan tuihalna chu a takin kan lantir a, goal mawi tak mai pahnih kan khung bawk.

"Hnehna chan chauh a ni lo a, point thum hlu tak kan hlawh chhuak bawk. Man United kan nih avangin kan chungah hian miten engtik lai pawhin beisei an nei sang reng dawn, chu chu kan hriat ve pawh a ngai a ni.

"Kan team hian goal mawi leh ṭha tak tak khung turin theihna pawh kan nei, tun ṭuma kan goal pahnih te kha a mawi a ni satliah lo a, inrintawkna sang tak nei chunga khung an ni tih a hmuh theih bawk," tiin a naute khelh danah a

lungawi hle.