Ferrari-in car thar SF1000 pho chhuak

Formual 1 team hlun leh ṭha ni bawk Ferrari chuan season thara an car hman tur ‘SF1000’ chu Romolo Valli Municipal Theatre, Italy-ah Thawhlehni tlai khan mipui hmuh theih turin an pho chhuak ta, team boss Mattia Binotto chuan an theih ang tawka ṭha a nih thu leh Mercedes khum thei tura an beisei a nih thu a sawi.

Season hmasa khan Italian team hian beisei an phak lo, intlansiak vawi thumah chauh hnehna an chang - an elpui Mercedes chu fal takin team champion an ni. Binotto chuan, “Car hmasa nen a lan dan hmelhmang a danglam vak lo a ni mai thei.

“Mahse, a tih theih leh ṭhatna chu danglam tak a ni thung. Keini lam chuan a ṭha thei ang tur leh chak thei tur ang bera kan ngaihin kan siam,” tiin an car thar chuan beiseina a siamsak thu a 

sawi chhuak.

Ferrari tan season thar hi kum chhinchhiah tlak a ni thei dawn, tluang taka an tlan a nih chuan Grand Prix vawi 1000 an tlan tlinna an tawng thei dawn; season dang zawng aiin champion an duhna a sang ngei ang.

World champion vawi li lo ni tawh Sebastian Vettel chuan, “Car hmasa nena a danglamna chu hun rei vak lo chhung pawhin a hriat nghal theih mai,” a ti. Ferrari driver pakhat zawk, 2024 thleng daih contract ziaktu Charles Leclerc pawhin car thar khalh a chak thu leh a nghahhlelh tawh thu a lo sawi ve bawk.

Leclerc chuan, “Car thar khalh chu chona a ni dawn a, a chakawm tawh hle. Hmasawn ngei tumin ka taksa pawh ka sawizawi nasa, season hmasa lama ka hun tawn aṭang khan zirlai tam tak ka zir chhuah bawk avangin beiseina pawh a sang,” a ti.

Season hmasa khan Leclerc hi qualifier lamah a tlan ṭha thei hle, a hmasa ber (pole position) aṭangin vawi sarih ngawt a tlan chhuak - record nei ṭha ber a ni; inelna takah erawh vawi hnih chauh hnehna a chang. A theihna a sang tih a chiang a, season thara driver ngaihven hlawh bik a ni ang.

Ferrari hi team hlun leh ṭha tak ni mah se tun hnaiah an hlawhtling tawk lo, driver leh team championship lama pakhatna an nih hnuhnung ber chu 2008 daih tawh kha niin, driver Kimi Raikkonen chu world champion a ni.

Season 12 chhung chu nomawi chawi loin an awm a, hetih chhung hian Red Bull leh Mercedes te an phak lo; kuminah erawh tun hma lama an ropuina ang kha neih let leh ngei an tum, season hmasa lama an driver pahnih in bakkaih ṭhin pawh thlen nawn tir an duh lo ang.

Team boss Binotto chuan, “Kan theihna zawng zawng kan hlan, a rih lohna turin ruahmanna pawh kan siam nasa. Tuna car thar hi chu kawng engkimah a hma mi aia ṭha zawk tura ngaih a ni,” a ti. Season thar inelna hmasa ber atan March 15 hian Australian GP an tlan dawn, an car hi a ṭha takzet em tih chu fiah a ni dawn.