Emery-a Villa an vul zel

Kum 26 chhunga Premier League-a an bul ṭan ṭhat ber Aston Villa chuan an tawng mek - 1998-99 season hnua a vawi khat nan match riatah point 17 an nei a, 'Big Six' zinga chhiar tel ni lo mah se, Unai Emery enkawl Villa hi ngaihthah theih an ni lo tih a lang nawn.

Inrinni zan khan Villa hian an mikhualna ramah Fulham chu 3-1 in an hneh a, tun season-a league match riat an khelhah vawi nga an chakna a ni - vawi hnih draw an nei a, vawi khat chiah an la tlawm.

Craven Cottage-a inkhelah Fulham hian goal an khung hmasa zawk. Minute ngana lekah mualneitu team tan Raul Jimenez chuan goal hmahruai a khung a, mahse, minute li hnuah Morgan Rogers chuan Villa tan si phurh a sut.

Goal dang lut loin chawlhlawk hman a ni a, second half-ah goal hnih leh red card pahnih kan hmu! Minute 59-naah Ollie Watkins chuan tun season-a a league goal ngana tur a tauh lut a, Youri Tielemans-a corner pet aṭanga a tauh luh a ni.

Fulham an talbuai zui. Goal an chhuah aṭanga minute ngana lekah Joachim Andersen chu Watkins laka a foul avangin hnawhchhuah a ni a, Issa Diop chuan a fimkhur tawk loh zarah Lucas Digne-a cross chu an lamah a tilut bawk!

Mualneitu team hian si phur leh player pakhata kim loin an khel a, chak tur a chiang tawh tiin a sawi theih. Villa bench aṭanga luhtir Jaden Philogene chu hun pek belh minute thumnaah a yellow card pahnihna avangin hnawhchhuah a ni a, mahse, Fulham tan chhawrna hun a awm tawh lo.