Goal li khungtu Tottenham Hotspur an tho

'Big Six' club zinga mi Tottenham Hotspur-in beisei angin season bul ṭan ṭha lo mah se, ngaihthah chi an la ni lo tih an pholang a, Premier League club liante hriat turin, "Kan la awm ve e" an rawn ti!

Spurs hian Inrinni zan khan West Ham an mikhual a, Julen Lopetegui hoa team ṭha din tum Hammers hi 4-1 in an lo sawp - Spurs tan Dejan Kulusevski, Yves Bissouma leh Son Heung-min ten goal khat ṭheuh an khung a, Hammers keeper Alphonse Areola chuan an lamah a tilut bawk.

Hammers winger Mohammed Kudus chuan mikhual team tan goal khung hmasa mah se, Spurs-in goal liin an chhanglet a, Kudus hi minute 86-naah hnawhchhuah a ni bawk - Spurs an chak a, league match riat an khelha an vawi li chakna chiah a ni.

Hei le Spurs

Inkhel ṭantir lamah Hammers an nung ṭha a, Mohammed Kudus-a'n chance pawh a nei hma hle - a chance neih hmasak zawk goal-a a chantir loh hnuin, minute 18-naah Ghana international hian hmahruaina goal a khung a, mikhual team-in 1-0 in hma an hruai.

Goal hmangin Spurs ben harhin an awm a, West Ham-in a vuak let an tuar zo lo. Minute 36-naah Kulusevski chuan si phurh sutna goal a khung a, Sweden captain hi Spurs tan a hmuhnawm tawlh tawlh - London club-in thlen san an tum chuan Kulusevski a ṭangkai zel ang.

Spurs hian first half-ah goal dang khung tawh lo mah se, second half-ah goal an sur tir. Minute 52-naah Bissouma chuan hmahruaina goal a khung a, Hammers keeper Areola-a'n an lama a tihluh hnuah thiampuipa Son chuan an goal lina khungin hmawr a bawk.

Hammers an buai

West Ham-in season ṭha zawk hman beiseiin, Europa Conference League hiala champion puitu David Moyes an thlah a, Scottish coach aiah hian Real Madrid boss hlui Lopetegui an la lut - a duh zawng player an pe tel a, tun dinhmunah erawh an tifuh rih lo.

Moyes-a hnuaiah Hammers hian counter-attack chu innghah nan an hmang ṭhin a, Spanish coach hnuaiah erawh tlarhnung aṭanga game 'play' in, ball chan tam a, attacking game khelh an tum a, mahse, an theihnain a tlin lo - kawng tinrengah Spurs an chungnung.

Hetihlai hian khel ṭha awmchhun Kudus chu Pape Matar Sarr leh Micky van de Ven laka a chet dan avangin hnawhchhuah a ni a, a tirah yellow card chauh pek ni mah se, video assistant referee hmanga en let niin, hnawhchhuah a ni ta zawk - Hammers hi tun season-a league match riat an khelhah vawi hnih chiah an la chak!