Saints lakah Leicester an tho chhuak

Inrinni zan Premier League inkhelah 'comeback' ropui hmuhtirin kan awm a, Southampton laka 2-0 a an hnufual hnuah Leicester City chu 3-2 in an 'comeback' - inkhel a hmuhnawm takzet.

St. Mary's Stadium-a inkhelah mualneitu team an huangtau a, minute riatna aṭangin goal an khung ṭan - minute 28 chhungin Saints hian Cameron Archer leh Joe Aribo hmangin goal an khung a, 2-0 a ni fel der!

Mikhual team Foxes tan beisei a bo tiin a sawi theih a, mahse, season hmasaa Championship nomawi chawitu team hi an beidawng ve lo. Minute 64-naah Facundo Buonanotte chuan si phurh a sut a, Foxes an phur sawt.

Minute 74-naah Ryan Fraser chu Jamie Vardy lakah a foul a, kum 37 mi striker hian ama penalty hlawhchhuah hi goal-ah a chantir a, 2-2 a ni der - Fraser hian penalty a chawi bakah hnawhchhuah a ni a, Leicester dinhmun a ṭha sawt.

Goal hnih ngawta hmahruai hman Saints an hawihai a, hun pek belhah an vanduaina belhchhahin a awm. Jordan Ayew chuan point thum aia hniama lungawi an tum lo tih pholangin, Harry Winks-a siamsak chu goal-ah a chantir a, Leicester an chak daih!