India ramah New Zealand an chak

Kum 36 hnuah New Zealand-in India ramah Test match-ah hnehna an chang. M. Chinnaswamy Stadium, Bengaluru-a inkhelah India-in first innings-a an chet chhiat an tuar an insiamrem thei ta lo, New Zealand-in wicket riatin nimin khan hnehna an chang.

Test match vawi thum khelh tura hmasa ber hi October 16-20, 2024 inkarah khelh a ni a, bat hmasak thlangtu India-in bul an ṭan fuh lo. First innings-ah India tana run siam tam ber Rishabh Pant-a'n 20 runs chauh a siam a, a dawttu Yashasvi Jaiswal pawhin 13 runs chauh a siam.

Virat Kohli, Sarfara Khan, KL Rahul, Ravindra Jadeja leh Ravinchandran Aswhin ten run khat mah an siam lo a, captain Rohit Sharma pawhin run hnih chauh a siam avangin first innings-a an run siam zat chu 46 runs a ni.

New Zealand tan Rachin Ravindra a che ṭha a, 134 runs siamin first innings-ah 402 runs an siam thung. Second innings-ah India an insiam ṭha a, Sarfara Khan (150), Rishabh Pant (99) leh Virat Kohli (77) te an chet ṭhat avangin 462 runs an tlin.

Mahse first innings-a an chet chhiat miau avangin New Zealand tana target chu 107 chauh a ni a, New Zealand-in Will Young (48) leh Rachin Ravindra (39) te hmangin 110/2 runs an siam a, wicket riatin hnehna an chang.

Test match vawi hnihna hi October 24-28, 2024 inkar hian Maharashtra Cricket Association Stadium, Pune-ah an khel leh ang.