Djokovic lakah Nadal chak lo

Tennis player ropui tak tak paruk ten 'Six Kings Slam' an khel a, tennis inkhel hi tournament pangngai ni loin 'exhibition' a ni a, tennis ngainatute erawhin an ngaihven hle.

Tun hnaia a chawlh tur ti chiangtu Rafael Nadal pawh a inlan, mahse Nadal hi Novak Djokovic lakah 6-2, 7-6 (7-5) in a chak lo a, anni pahnih hi Grand Slam champion tam ber leh pahnihna te an ni.

Davis Cup khelh zawh ruala tennis chawlhsan tur Nadal chuan, "Novak nen hian zinkawng ngaihnawm leh hautak zet mai kan zawh dun a, inelna hautak leh nuam tak kan nei dun bawk, a chungah hian ka lawm takzet.

"Ka tan chuan engkim mai hi a tawpna a ni zel tawh a, chuvangin a khawhar thlak zawnga ngaihtuah theih vek a ni bawk. Professional tennis player nih kha ka duhthusam a ni ṭhin a, chumi ka ti hlawhtling thei erawh ka lawm," a ti.

November thla hian ram leh ram mipa tennis team hmanga inelna Davis Cup an khel dawn, an ram Spain tan Nadal hi a inlan ang - Davis Cup nomawi hi tun hma pawhin a lo lakpui tawh a ni.

Inrinni zan khan Six Kings Slam exhibition final hi khelh niin, world number 1 Jannik Sinner chuan tunlaia a elpui ber Carlos Alcaraz chu 6-7 (5/7), 6-3, 6-3 a hnehin a champion a, number 1 ni chunga kum tawp hmang tur a ni bawka boruak a nei ṭha thei hle a ni.