Tlawm la nei lo Real an kal zel

Spanish La Liga match 10 an khelh tawhah Real Madrid an la tlawm lo - champion lai hian Inrinni zan khan Celta Vigo chu khualmualah an lenchilh a, 2-1 in an hneh.

Real tan Kylian Mbappe leh Vinícius Júnior te chuan goal khat ve ve an khung a, Celta Vigo tana Williot Swedberg goal khungin awmzia a nei phak lo - Real hian hnehna an chan avangin hmahruaitu Barcelona nen an point hmuh zat a inang mek.

Mahse, he thuziak i chhiar meuh chuan team pahnih inkara point awm dan a danglam leh tawh mai thei. Hansi Flick-a hnuaia team hmuhnawm tak din mek Barcelona hian nizan khan Sevilla an mikhual a, result kan hre hman lo.

Real leh Barca hian kar laihawlah Champions League an khel ang a, Inrinni zanah El Clasico an khel zui ang - Spanish football ngaihnawmna chawh nun tharin a awm leh mek.

Real an dam

El Clasico khelh hma karah Real-in chanchin lawmawm an nei a, hliam vanga an match hnuhnung pahnih a inlan loh hnuah Thibaut Courtois-a'n si ban a nghak leh ta a, tun hnaia Sweden lama pawngsual thubuai nei Kylian Mbappe pawhin goal hmangin buaina a nei lo tih a pholang.

French striker hian minute 20-na lekah goal hmahruai a khung a, Eduardo Camavinga siamsak chu a insiamrem hnuah mawi zetin goal-ah a chantir - Real a zawm tirha sawisel hlawh striker hian tun season inelna hrang hrangah match 12 khelin goal riat a khung ta.

Hetihrual hian Real hi nuamsain an chak lo. Mbappe goal khung hnuah goal dang an nei lawk lo a, 1-0 in chawlhlawk an hmang. Second half ṭan aṭanga minute ruk hnu lawkah Celta hian Williot Swedberg hmangin si phurh an sut zui a, 1-1 a ni.

Mahse, team ṭha danglamna chu an khelh ṭhat loh niah pawh an chak lehzel mai hi a ni. Real tan Vinicius Junior chuan minute 66-naah chakna goal a khung a, 2-1 in Real an haw.

Real an vannei

Madrid khaw club-in vannei takin point thum an hlawh chhuak, tiin a sawi theih a, Celta tlarhma hriam hret se chak lo thei an ni - tun season-ah Real hian game hmuhnawm lo phochhuah an nei ta fo a, coach Carlo Ancelotti-a'n hna a la nei nual tih a lang.

Celta tan goal khungtu Swedberg-a'n si an phurh hmain goal khungna chance ṭha a nei a, mahse, kum 20 mi Swedish midfielder hian keeper Courtois chiah a hmachhawn chungin goal-ah a chantir thei lo - a ui vawng vawng ang.

Real tlarhnung a nghing a, Celta lam hian an enchhin fo - hetihlai hian Real erawh an hlauhawm hman meuh lo thung! Celta tan Borja Iglesias chuan goal a khungah inngai mah se offside vangin pawm a ni lo a, Vinicius pawh pawmsak a ni lo.

Madrid khaw club hi La Liga match 42 zet tlawm loin an kaltluang tawh a, anni aia Spanish top flight league-a tlawm nei loa kal rei awmchhun Barcelona (43) chu kartawpah an tum dawn!

Tar ve lo Modric

Minute 63-naah Federico Valverde thlakin Luka Modric a lut a, Croatian midfielder hi Real Madrid tana inlan thei upa ber a ni nghal - kum 39 leh ni 40 mi a ni a, Hungarian legend Ferenc Puskas (kum 39 leh ni 37) record chu a khum.

Modric hi record siam tura luhtir a ni satliah lo a, game boruak sangah team tan a la ṭangkai ṭhin. Celta lakah pawh inkhela danglamna thlen turin a nghah rei a ngai lo - minute thum chiah hun a hmang hman tihin Vinicius-a khung tur chu a siamsak.

Real coach Carlo Ancelotti chuan, "Modric ang player ka enkawl thei hi ka lawm takzet a, chawimawina leh thil dang zawng zawng hi a phu em em vek a ni," a ti a, Croatian midfielder chu player danglam bik a nih thu a sawi.

Kum 2012-a Tottenham Hotspur aṭanga Real pantu Modric hian Spanish club tan inelna hrang hrangah match 547 khelin goal 39 a khungsak a, assist vawi 89 a nei bawk. CLub tan nomawi chawi theih ang chu a chawi kim tawh.