Milan leh Juve an chak

Ruah sur hnuaia inkhelah AC Milan chuan an mikhual Udinese chu 1-0 in an hneh, Serie A inkhela goal awmchhun hi forward Samuel Chukwueze-a'n minute 13-naah a khung a ni.

San Siro-ah Milan hian goal an nei hma hi an vanneih pui, minute 29-naah an midfielder Tijjani Reijnders chu hnawhchhuah a ni a, tlem zawk ni mah se goal an neih hmasak avangin an inveng tluan.

Milan manager Paulo Fonseca chuan, "Kan kim loh chiah khan inpumkhat a ngai lehzual a, chesual thei kan ni tih kan inhriatchian avangin kan fimkhur lehzual. Milan kan nihna a taka kan lantir avang erawh chuan ka lawm," a ti.

Inkhel dangah Juventus an vannei. Hun tawp dawnah Lazio defender Mario Gila chuan anmahni lamah a ti lut palh a, an mikhual lakah Old Lady hian harsa takin point thum an hlawh chhuak hram.

Allianz Stadium-ah Lazio defender Alessio Romagnoli chu minute 24-na lekah hnawhchhuah a ni a, an kim loh hnuah manager Marco Baroni-a'n a naute a remkhawm phui ṭha hle, a tawpah erawh an vanduai ta hlauh thung.

Juve manager Thiago Motta chuan, "Lazio hi kan lakah chauh ni loin team dang lakah pawh an khel ṭha thei hle. A bik takin tum ṭumah kha chuan anmahni goal an veng uluk em em a, kan tan sut tlang an harsa," tiin a sawi.

Turin club Juve hian Serie A match riat aṭangin point 16 an hmu a, hmahruaitu Napoli nen an point a inzat. Mahse, nizan khan Antonio Conte kaihhruai Napoli an inlan a, an chak chuan Naples-a club an kal fal leh ang.