Brighton lakah Magpies an tlawm

Robert de Zerbi-a'n a chhuahsan avanga talbuai tura ngaih Brighton & Hove Albion an talbuai duh lo - league match riat khelh tawha an vawi li chakna ni turin Newcastle United chu khualmualah 1-0 in an hneh a, Danny Welbeck chuan inkhela goal awmchhun a khung.

St. James' Park-a inkhelah Brighton-in khel ṭha lo mah se, a pawimawh ber goal an khung. Minute 35-naah thla thara kum 34 tling tawh mai tur Welbeck chu Georginio Rutter nen an in 'one-two' a, English striker hian mawi zetin a hmawr a bawk.

Manchester United leh Arsenal tan pawha lo khel tawh Welbeck hian season hmasa khan Premier League-ah match 29 khelin goal nga a khung a, tun season-ah match riat aṭangin goal nga a khung tling der tawh - upat tawh lamah a vul thar leh mek.

Newcastle tan January hnua mahni muala Premier League match-a an tlawm hmasak ber a ni a, an chance neih an chhawr loh chu an vanduai pui - Alexander Isak leh Anthony Gordon ten an chance neih goal-a an chantir theih loh an thlirlet ang a, mawhphurtu an ni tih an inhria ang.