Season thar beiseitu Nishikori

Tennis season liam taah khan player ṭhenkhat chu hliam vangin an inkhel mumal lo, an zingah hian US Open final khel tawh Kei Nishikori pawh a tel. Season tharah erawh ṭha taka inkhelh ve theih tawh ngei a beisei thu a sawi.

Japanese tlangval hian 2007 aṭang khan inelna lian leh sang a khel phak, world ranking lamah pawh palina hialte a ni hman - ATP Tour title pawh 12 a la tawh. Mahse tun hnaiah hliam leh harsatna dang vangin a inkhel tlem, world ranking-ah pawh 41-na a ni phak hram.

Nishikori chuan, "Covid-19 vangin hun rei tak kan inkhel thei lo a, inkhel tura kan lo kir leh hnuah pawh ka dar na vangin Paris leh Sofia lamah ka inkhel thei lo, ka hliam kha na tak ni lo mah se nat belh ka hlauh vangin ka inkhel lui duh lo.

"Season tharah chuan beiseina ka nei, rilru thar nen ṭha taka inkhelh theih ngei ka inring. Mitin mai hian kum ṭha lo bik leh chet fuh loh ṭum kan nei thei, ka tan chuan season hmasa kha chutiang kum ṭha lo chu a nih ka ring," a ti.

Ruahman lawk dan chuan January thla chawhnu lam hian Grand Slam hmasa ber Australian Open an khel dawn a, tualchhung tlangval Nick Kyrgios pawhin inlan theih ngei a inring.

Australian tlangval hian season hmasa khan a hnungzâng na vangin US Open leh French Open a khel thei lo. Kyrgios chuan, "Tournament khel thei lo mah ila training ka nei reng tho a, tunah hian court chhunga inkhelh leh hun ka nghakhlel takzet," tiin a sawi.

Season hmasa a hliam nei langsar zingah 2008 Australian Open finalist Jo-Wilfried Tsonga pawh a dam tawh a, Melbourne khawpuiah a inlan thei ang.

Australian Open khel thei lo tur chiang zingah 2009 US Open champion Juan Martin del Potro chu hming langsar a ni. Argentine hi a khup ding lam hliam zai a ni a, engtik hunah nge a lo kir dawn tih hriat theih a la ni lo.