Hoffenheim an chak ve ta

Thawhṭanni zan Bundesliga inkhelah Hoffenheim-in FC Augsburg 3-1 in an hneh. Sebastian Hoeness hote hian point thum an hmu chungin match 10 aṭangin point 12 an hmu pha chauh a, table-ah 10-naah an awm. 

Rhein-Neckar Arena a inkhelah hian Hoffenheim tan Florian Grillitsch-a'n minute 17-naah hmahruaina a khung a, Augsburg-in Daniel Caligiuri hmangin minute 31-naah an sut.

Hoffenheim tan second half ṭan chiahah Austrian midfielder Grillitsch bawkin a khung leh a, minute 50-naah Ihlas Bebou-a'n chak nemnghehna goal a khung.

Mizoram rawn zin tawh Hoffenheim hian league match hmasa pahnihah FC Cologne leh champion lai Bayern Munich meuh hneh thei mah se hemi hnu match sarihah hian chak hmel an hmu lo a, match liah an chak lo bawk.

Tun hnaia result ṭha an neih loh avangin Hoffenheim tan Augburg hneh hi result ṭha a ni a, inrintawkna pawh an neih let phah ang. Hoffenheim hian Pathianni zanah table-a pahnihna Bayer Leverkusen an tlawh ang.