Rogers Cup champion Novak Djokovic

Novak Djokovic chuan Pathianni zan khan Kei Nishi-kori chu straight set-a hnehin a vawi li nan Rogers Cup champion a ni. World number 1 hian ATP World Tour Masters 1000 title 30 a lakna chiah a ni a, tennis a khelh hun chhungin title 66 a lakna chiah a ni - Hmeichhe inelna lam-ah Simona Halep chuan Madison Keys hnehin champion nomawi a chawi bawk.

Wimbledon-ah Sam Quer-rey hneh loin third round-ah tla mah se Rogers Cup-ah erawh Djokovic-a'n amah khing zotu a tawng lo chiang hle. Toronto-a inkhelah Serbian thiampuipa hian match nga a khelh
aṭangin set a hloh miah lo a, final-ah pawh hian darkar khat leh minute 23 chhung chauhin Japan tlangval Nishikori hi 6-3, 7-5 in a hneh.

Djokovic hian "Khingpuite hneh tur chuan na taka nawr aiin mahni inven ṭhat hmasak a pawimawh zawk" tiin a lo sawi tawh ṭhin a, final-ah pawh hian vawi khat mah double fault a nei lo! Hei mai bakah hian a service hmasa 76% zet chu a dik nghal bawk a ni.

Inkhel chungchang sawiin Djokovic chuan, "Ka service hmasa aṭanga ka point hmuh kha 82% zet a ni a, vawi nga ace ka siam bawk. Wimbledon hnua chawlh ka neih hnuah ṭha takin ka lo kir thei a, duhthusama
ṭhain ka khel chhuak thei," a ti. Kum 29-a upa Djokovic hian kuminah nomawi pasarih a chawina chiah a ni a, Nishikori hi a zawna vawi kua a hnehna chiah a ni bawk.

Champion Djokovic hian $782,525 (Rs 5,22,17,854.12) bakah Emirates ATP Rankings point 1,000 a hmuh belh a, pahnihna Nishikori-a'n $383,690 (Rs 2,56,03,614.52) bak-ah Emirates ATP Rankings point 600 a hmuh belh ve thung.

Mipa double final-ah Croatia tlangval Ivan Dodig leh Brazil star Marcelo Melo te ṭang dun chuan Jamie Murray leh Bruno Soares te ṭang dun chu 6-4, 6-4 a hnehin an champion bawk a ni.

Rio lam hawiin

Serbian tlangval Djokovic hi 'ram hmangaih' tia sawi ṭhin a ni a, Rogers Cup a champion hnuah pawh tunkar Zirtawpni
aṭanga neih ṭan tur Rio Olym-pic-a an ram tana inkhelh a chak tawh thu a sawi.

Masters title 30 la tawh Djo-kovic chuan, "Olympic hi khaw-vela infiamna kutpuiah chuan a ropui ber a ni a, he huna tel ve thei nih ringawt pawh hi ka tan chuan chawimawina a ni tawh a, ka ngaihlu takzet bawk," a ti.

2008 Beijing-ah khan Djokovic hian single-ah bronze medal a dawng a, 2012 London-ah khan Juan Martin Del Potro chu bronze medal inchuhnaah hneh loin medal a dawng lo. Kuminah hian Rafael Nadal leh Andy Murray te nen champion an inchuh tura ngaih a ni. Grand Slam vawi 17 champion tawh Roger Federer erawh a hliam dam chian nana inenkawl a duh avangin Brazil-ah a hmel kan hmu dawn lo thung.

Beiseina a neih thu sawi chhunzawmin, "Olympic Games-a inlan hi infiammite duhthusam a nih zia chu ka sawi fiah theih rual a ni lo a, medal dawngtu nih ngat phei chu a ropui a ni. Rio-ah hian single leh double-ah ka inlan dawn a, medal pakhat tal ka hlawhchhuah theih ka beisei," tiin a sawi.

Hmeichhe champion Halep

Simona Halep chuan Madi-son Keys lakah 7-6 (7/2), 6-3 a hnehna changin WTA Montreal hardcourt tournament-ah hian a champion ve bawk. Romania star hian tennis a khelh hun chhungin title 14 a lakna chiah a ni.

World number 5 Halep hi Grand Slam-ah hlawhtling thei rih lo mah se kuminah player ṭha berte zinga mi a ni a, Montreal hma hian Madrid leh Bucharest-ah te a lo champion tawh bawk. Tun hnai a inkhelh hnuhnung vawi 26 aṭangin ṭum 23 zet hnehna a chang thei. Romania tan Rio Olympic-ah medal lak an beiseina ni mah se kum 24-a upa Halep hian hrileng Zika vangin Brazil a pan loh tur thu a lo ti chiang tawh.

Halep chuan, "Ka khelh ṭhat ber ni a ni lo a, hnehna ka chang thei hi ka vanneih vang leh Keys khelh ṭhat loh ni ka tawn fuh vang a ni. Ani khan unforced errors vawi 45 zet a nei a, ka tan dinhmun ṭhatna tham a tling. Ka ball vuak a na tawk lo a, ṭha taka season khar tur chuan hmasawn ka ngai," tiin a sawi.