India-in Bhutan leh Puerto Rico hmachhawn dawn

USA lamah tour neih tumin India team inbuatsaih mah se All India Football Federation (AIFF) chuan Visa buaipui tura hunin a daih tawh loh thu an sawi a, India team hian practice match-ah Bhutan leh Puerto Rico an hmachhawn dawn ta zawk.

AIFF general secretary Kushal Das chuan, "USA kal tura visa dil hun chhung hian hun a duh rei em em a, chutiang nghak tur chuan hunin min daih tawh lo. Official match khel tur kan nih chuan loh avangin Bhutan-ah ni thum vel training neiin an national team nen kan inhmachhawn ang a, Puerto Rico kan mikhual leh bawk ang," tiin a sawi.

Ruahman ang chuan India hian karleh lamah chuan FIFA ranking-a 192-na Bhutan hi an hmachhawn ang a, September-ah Puerto Rico hi an mikhual thung ang. FIFA ranking-a 112-na ni phak team hi India-in a lo mikhualna tur stadium erawh tih chian a la ni lo thung.

FIFA ranking chhuak thar bera hmun 11-a hmasawn chunga 152-na dinhmun luahtu India team-ah hian Mizo tlangval pali Jeje Lalpekhlua, Lallianzuala Chhangte, David Lalrinmuana leh Isaac Vanmalsawma-te awm mekin AFC Cup khel tur Bengaluru FC leh CFL khel tur East Bengal player-te koh an ni lo.

India squad:

Goalkeepers: Subrata Paul, T.P Rehenesh, Laxmikant Katti-mani, Albino Gomes.

Defenders: Pritam Kotal, Sandesh Jhingan, Fluganco Cardozo, Chinglesana Konsham Singh, Aiborlang Khongjee, Koushik Sarkar, Gurjinder Kumar.

Midfielders: Isaac Vanmalsawma, Rowlin Borges, Dhanpal Ga-nesh, David Lalrinmuana, Vinit Rai, Germanpreet Singh, Pronoy Halder, Lallianzuala Chhangte, Jackichand Singh.

Forwards: Halicharan Narzary, Jeje Lalpekhlua, Sumeet Passi.