German-ah pawh Hamilton bawk

Season bul ṭan ṭha lo mah se Lewis Hamilton-a'n a theihna san zia a pholang mek zel. British driver hian Pathiannia tlan zawh tak German Grand Prix-ah pakhatna dinhmun luahin a champion nomawi humhim turin driver cham-pionship-ah hmahruaitu a nih chhunzawm zel.

Hockenheim-a intlansiakah qualifying lama che ṭha Mer-cedes driver Nico Rosberg-a'n pole position aṭangin bul ṭan mah se beisei angin a cheṭha lo a, intlansiak ṭan tirhah a teammate Hamilton-a'n leh-pelin a tawp thlengin a chungnung tluan thei. German driver Rosberg erawh palinaah thlengin Red Bull driver pahnih Daniel Ricciardo leh Max Verstappen te a tluk lo.

Khawtual tlangval Sebastian Vettel chu an ram mipui ten beiseina sang tak nen lo thlir mah se world champion vawi li ni tawh Vettel hi pangnaah a thleng hram a, Ferrari driver Kimi Raikkonen chu parukna a ni thung.

German Grand Prix bikah hian Ayrton Senna, Jackie Stewart, Juan Manuel Fangio leh Fernando Alonso ten vawi thum hnehna an lo chang tawh - Hamilton hian heng driver palite record hi a rawn nih rual chiah. German GP chanchina sulhnu nei ropui ber erawh vawi li hnehna chang thei Michael Schumacher a ni thung.

Season hmasa pahnihna Rosberg hian season bul a ṭan fuh em em a, intlansiak hmasa paliah hnehna a chang vek. Mahse, pakhatna dinhmun a luah hnuhnun ber chu June 19-a tlan Europe Grand Prix daih tawh kha a ni a, a insiam ṭha thuai a nih loh chuan pahnihnaah a lungawi leh a ṭul mai thei.

Kum 31-a upa Hamilton chuan, "Kan team chungah ka lawm hle, kawng min hawnsak a, ka chhawr ṭangkai theih avangin ka hlim a ni," tiin a teammate Rosberg-a'n hmahruai thei tura kawng a ken vanga a lawm thu a sawi chhuak.

Champion lai Hamilton hian tun hnai intlansiak hnuhnung pasarihah vawi ruk ngawt hneh-na a chang thei a, point 217 hmuin Rosberg lakah point 19 zetin a sang fal leh tawh. Point 133 hmutu Ricciardo chu pathumna niin Raikkonen-a'n point 122 a hmu ve tawh bawk.