Parc des Princes Roreltu Rashford

March 2019 - Manchester United-in Parc des Princes-a Champions League League-ah Paris St-Germain hneh turin si hniha chak an mamawh  - minute 90+4 a chakna goal thuntu chu Marcus Rashford a ni.

October 2020 - United-in Champions League-a an game hmasa berah Parc des Princes-ah PSG bawk an hmachhawn leh a, minute 87-naa chakna goal thuntu chu Rashford bawk a ni.

Thawhleh zan inkhelah hian United-in 2-1 in PSG an hneh. English club tan Bruno Fernandes-a'n penalty a khung a, PSG goal hi Anthony Martial-a'n an lama a tauh luh a ni.

Group H inkhel dangah RB Leipzig-in Istanbul Basaksehir 2-0 in an hneh a, goal hnih hi Manchester City aṭanga loan hmanga German club-in an hawh Angelino-a'n 

a khung.

Tottenham Hotspur laka 6-1 a an tlawm avangin Ole Gunnar Solskjaer-a'n sawisel a hlawh a, Norwegian manager hian Spurs laka an mualpho hnuah 'risk' lain Newcastle United (4-1) leh PSG (2-1) te an hneh.

PSG hmachhawn tur hian match fitness neih loh avangin Edinson Cavani hruai a ni lo a, inhliam vangin captain Harry Maguire leh Mason Greenwood-te an zin lo bawk. 

Solskjaer-a'n Neymar, Kylian Mbappe leh Angel di Maria-te awmna team lakah goal venhim a ngai pawimawh. Goalkeeper David de Gea rin chhunzawm a ni a, academy chhuak Axel Tuanzebe chu kum 2020-a vawi khat nan luhtir niin defence laiah Victor Lindelof leh Luke Shaw nen an inkawp. Mual sir aṭanga goal ven leh goal nawr hna thawk turin player thar Alex Telles leh Aaron Wan-Bissaka-te dah an ni.

Midfield-ah Fred, Scott Mc Tominay leh Maguire awm loh vanga captain Bruno Fernandes te an awm a, tlarhmaah Rashford leh Martial-te an inkawp. Midfielder langsar pahnih Paul Pogba leh Donny Van de Beek te bench-ah an awm.

Thla 18 liam ta khan Parc des Princes-ah Man United-in PSG hi ropui takin an lehthal tawh a, tun ṭumah pawh hian UCL finalist lakah hian minute 90 chhungin an khel ṭha zawk.

Anthony Martial-a'n penalty a hlawh chhuak a, Newcastle nena penalty hlahtu Bruno Fernandes-a pet chu Keylor Navas-a'n dang mah se PSG keeper hian line a pel. Fernandes-a'n a vawi hnihna tisual nawn tawh loin minute 23-naah goal hmahruai a khung.

First half-ah PSG an bil a, second half-ah an khel a nung hret. Chutih rualin an goal khungna erawh Martial-a tihsual liau liau a ni - Neymar-a corner pet chu anmahni lamah minute 55-naah a tauh lut.

Hun tawpah Parc des Princes-a an chak hmasak ṭuma penalty khungtu Rashford bawk a rawn lang a, minute 87-naah ṭha zetin a pet goal - keeper Navas dem theih a ni lo. Solskjaer-a hoten Paris aṭangin point thum hlu tak an hawn.

PSG-in UCL final an luh ṭuma an attacking game ṭha tak an la chhunzawm thei lo a, chutih rualin player ṭha an neih miau avangin United tlarhnung tan buaina tham a tling. Keeper De Gea-a'n Angel di Maria leh Layvin Kurzawa bakah Mbappe te goal khung tur ṭha takin a dang.

United tlarhnung a khawng ṭha a, Tuanzebe-a'n Mbappe chance ṭha tak neih tur a dang hmante chu Solskajer-a tan hmuh a nuam khawp ang. PSG tlarhnung a nem ve tho avangin mikhual team hian goal khungna chance ṭha an ngah zawk a, Martial leh Rashford-te a tawp thlen hmain an zuzi leh ṭhin.

Rashford hian hun pawimawhah thutlukna a siam sual a, United-in point khat chauh hlawh chhuak se mawhphurtu tur a ni. Amaherawhchu a tawpah goal ṭha zet a khung a, a tihsual zawng zawng an ngaidam ang.

Sawi hmaih theih loh erawh United player thar Telles-a ball pet a dik a, bench-ah Pogba awm mah se French midfielder luh hnuah inkhel a nung. Chutih rualin Tominay leh Fred-te an khel ṭha em em a, Brazilian midfielder hi a tlan tam bakah tih ṭhat a ngah avangin United kawr haa a chet ṭhat ber ang hiala chhal theih a ni?

PSG boss manager Thomas Tuchel chuan, "Second half-ah insiamṭha mah ila min vaw let tur kan dang chat thei lo. Kan khelh dun danah kan chiang lo a, kan khelh dan a lungawi thlak loh. Kan khelh chhiat chhan ka hre lo a, insiamṭhat erawh a theih tih ka chiang," tiin an khelh danah a lungawi loh thu a sawi.

Man United manager Ole Gunnar Solskjaer chuan, "Khualmualah kan khel tih kan hria a, kan khingpui kan hriat chian bawk avangin goal venhim a ṭul. David de Gea a pawimawh dawn tih kan hria a, beisei phak bakin Axel Tuanzebe a khel ṭha bawk. Chak kan phuin ka hria a, group stage paltlang turin point 10 tal kan mamawh dawn avangin Leipzig nena kan inkhel leh tur hi a pawimawh ang," tiin an khelh danah a lawm hle.