I Day Football 2016 Ramhlun N hmaah Lajong striker Milan
Shillong Lajong FC striker Milan Basumatary-a'n Bethlehem Vengthlang FC tlarhnung a pal darh a, vawiin tlai dar 2:45 hian goal la chhuah lo Ramhlun North a hmachhawn leh dawn. Shillong club hmaah MPL kaithar Ramhlun North fiahin an awm dawn a, Assam forward Milan hi a en bik tlak ang.
Tu nge Milan?
Shillong Lajong-in season liam ta I League khualmuala an khelh hmasak berah Bengaluru FC an hmachhawn a, hemi ṭum hian Milan Basumartary hian minute 87-naah Bipin Singh a rawn thlak. Assam rawlthar forward rawn luh hi chuan Lajong-in goal thum an phur tawh a, kum 18-a upa Milan-a tan tih theih a awm tawh lo.
I League-ah Milan-a hmel hmuh tur a awm tawh lo a, Federation Cup khel turin senior team-ah koh a ni tawh lo. Amaherawhchu Milan hian July thla khan Assam-a 8th Bodousa Cup-ah Lajong Junior team a champion pui a, top scorer bakah best player a thlan a ni.
Kum 18-a upa Milan hian match ruk khelhah goal 11 khungin assist vawi li a nei a, man of the match-ah ṭum li zet thlan a ni bawk.
July thlaa Lajong player of the month hi August thlaah pawh a la hmuhnawm zel ang. Shillong Lajong junior coach Alison Kharsyntiew chuan, "Milan hi a record thlirin tournament
ṭha tak a hmang tih a lang a, tournament pakhata Lajong striker chetṭhat ber ṭum niin team champion puitu a ni," tiin a fak.
Kum 18 leka upa Milan hi talent nei ṭha bik a ni a, kum 2012 khan Mir Iqbal Hussain Trophy-ah Assam U15 tan khelin top scorer a nih bakah most valuable player a thlan a lo ni tawh. Lajong a zawm hma hian AIFF Elite Academy-ah te pawh lo awm tawhin Dutch club lar PSV Eindhoven-ah te pawh trial a nei tawh.
Boudousa Cup-a nomawi an chawi hnuah Lajong striker Milan hi I Day Football-ah a rawn inlan a, match hmasa bera BVT an hmachhawn
ṭumin a tlan chak vang leh thiam vang liau liauin chakna goal a khung bakah a chevel a hmuhnawm hle.
Lajong nge nge
Shillong Lajong hian an match hmasa berah point thum hmu nghal mah se BVT tlarhma dang turin vanneihna an mamawh a, hun tawpah erawh team ṭha danglamna langin player 10-in hnehna an chang.
Lajong keeper Phurba Temba La-chem-pa chuan red card a hmuh avangin Neithouilie Chalieu-a'n a hmun ruak hi a hnawhkhah leh rin a ni a, I League-a tawnhriat la nei lo keeper pahnih hi an match hmasa berah an khel ṭha tawk lo.
Bench aṭanga lut Chalieu-a'n a tihsual vangin Shillong club-in goal an chhuah a, hun tawp thlengin rilru hahdamin an awm lo.
Heti chung hian Lajong assis-tant coach Gumpe Rime chuan, "Kan keeper-te an la naupang nachungin an khel ṭha hlein ka hria. Lachempa khan red card a hmuh hma zawng khan ṭha takin a veng a, Chalieu-a'n vawi khat a tihsual bak kha tihsual dang a nei lo," tiin Mahindra United, Vasco, HAL, ITI, Salgaocar leh Lajong keeper hlui chuan a keeper-te a chhan thu Vanglaini palai a hrilh.
I Day Football 2011 champion hian kalphung mumal tak an nei a, Mizoramah naupang rual rawn hruai mah se Jacob Lalrawngbawla, Joseph Lalfakzuala leh Samuel Lalmuanpuia-te telna team hi champion tura rinkai zingah an telpha zel.
MPL kaithar
Ramhlun North-in an match hmasa berah Zo United an hmachhawn a, MPL kaithar club hian point khat an hlawh chhuak.
Coach Lalruatliana Sailo (Tawia) chuan, "Game kheh dan zir bik kan nei a, kan la tihlawhtling lo chungin kan thiam hret hret. Kan team hian draw tumin kan khel dawn lo a, Lajong lakah hian point thum hmuh kan tum," tiin a sawi.
Siaha DFA-in an hrem vangin striker MC Malsawmzuala chu an DFA lamin a ngaihdam dilna an pawmsak avangin hrem a ni tawh lo a, Lajong hmachhawn turin a luh ngei rin a ni.
Zo United an khelh ṭumin midfield khaipa tura beisei Lalchhuanpuia'n team a kaihruai pha lo a, ball thiam David Lalrinchhana'n jersey no. 10 a hak chhan a tihlawhtling pha lo. MPL kaithar club tana thu lawmawm erawh goal an chhuah lo - C. Ram-dinmawia hoin Ramhlun North tlarhnungin I League-ah pawh che ṭha Samuela telna Lajong an hmachhawn dawn.
Ramhlun North boss Tawia chuan, "Lajong hi chuan kalphung nghet an nei a, naupang rual pawh khel se I League-a tawnhriat nei an awm ṭeuh avangin team ṭha tak an ni. Hetianga team ṭha hneh tur chuan player-te ṭum dang aia an thawhrim a ṭul dawn a, veng -chhung mipui ṭawiawmna ṭha a pawimawh bawk ang," a ti.
MPL an tlinna kawngah Ram-hlun North tan an veng mipui an ṭangkai a, an supporter hian hun pawimawha awmze neia an ṭawiawm a nih chuan an club chanchina sawi reng tlak sulhnu an hnutchhiah thei dawn a ni.
I Day Football - Group B
Fixtures & Standings
Vawiin Inkhel Tur
2:45 PM Ramhlun North FC Vs Shillong Lajong FC
August 4, Ningani
2:45 PM Bethlehem VT Vs Zo United FC
TEAM DINHMUN
GROUP B
# Team Pld W D L GF GA GD Pts
1 Zo United FC 2 1 1 0 1 0 1 4
2 Shillong Lajong 1 1 0 0 2 1 1 3
3 Dinthar FC 2 1 0 1 1 1 0 3
4 Ramhlun North FC 1 0 1 0 0 0 0 1
5 Bethlehem VT FC 2 0 0 2 1 3 -2 0