Manchester City player thar Sane?

Nimin khan Schalke chuan an winger Leroy Sane chuan Manchester City-a zawm hnaih thu an puang a, Austria-a an team training zawm loin Manchester khawpuiah a awm thu an sawi.

City manager Pep Guardiola chuan July 21 khan Germany international hi lakluh a tum thu zep loin a lo sawi tawh a, a man zat tur hi pound maktaduai 37 niin a chet ṭhat dan a zira sang chho leh tura ruahman a ni a, he thuziak i chhiar meuh chuan City player a ni tawh hial mai thei.

Kum 20-a upa winger hian season hmasa khan Bundesliga-ah Schalke tan match 33 khelin goal riat a khung a, league-ah pangana dinhmun hauhpuiin nipui bazar inhawn rual khan club sporting director Christian Heidel hnenah chhuah a duh thu a lo sawi tawh a ni.

Schalke youth system chhuak, April 2014-a senior team tana a match hmasa ber khel ve chauh Sane hi Euro 2016 khelh zawh takah khan Germany squad-ah telin ram tan match li a khel tawh.