AIFF Under 19 nge Chanmari West tla dawn?

I Day Football Group A-ah Chanmari FC-in point ruk an hmu tawh a, Aizawl FC-in point thum an hmu leh tawh bawk. MPL hnuhnung pahniha finalist pakhat zawk hi chuan semifinal lut chiang tura dah ta ila, hmun ruak pakhat chiah a awm tawh - vawiin chhun dar 12:00-a AIFF Under 19 leh Chanmari West inkhela chak lo zawk hi chu tla mai tura ngaih theih an ni.

Vawi 2 inlanna

Chanmari West FC hian an match hmasa berah Chhinga Veng FC chu 3-3 in draw a, team ṭha an ni. West Warrior hi ni ruk lai an awl a, tlar-hnung pawp siamṭha tura hun
thawl an neih bawk avangin HC Zarzoliana hote hian inkhel hmuh-nawm an khelh theih ngei a rinawm.

West Warrior coach Zara chuan, "AIFF Under 19 leh Aizawl FC inkhel kha ka en a, an thiam ka ti. Ruahsur hnuaiah khan Lammual a ṭhat tawh loh bawk avangin an che buai a, an goal hmasa ber luh dan khan player-te a tihnual bawk. Fimkhur takin kan khelh a ṭul dawn a, kan khelh ṭhat niah chuan kan chak ngei ring mah ila chak lo thei pawh kan ni," tiin Vanglaini palai a hrilh.

AIFF Under 19 hi an khingpui tur Chanmari West ang thoin vawi khat chiah an inlan a, inkhelh
ṭantirh lamah game hmuhnawm tak an khel, ruahsur hnu khelmual nâlah an buai a, Aizawl FC lakah point an hlawh chhuak lo. Rawlthar rual player-te hi minute 90 chhung ṭha taka khel turin an ṭha tawk em tih vawiin hian a hriat ang.

AIFF Academy coach Floyd Pinto chuan, "Kan goal hmasa zawk chhuah dan sawi a hun tawh lo a, tunah chuan kan insiamṭha tur a ni. I Day Football-a beiseina nei zel turin result ṭha kan mamawh a ni," tiin West Warrior nena an inkhel tur a pawimawh thu a sawi.

Edu leh Pogba?

Lunglei rawlthar Edmund Lalrindika'n minute 54-naah khelmual a rawn rap a, Aizawl FC-in inkhel an thunun tawh hnu a nih bakah chhum zin vanga inkhelh chawlh zeuh a nih avangin AIFF Under 19 captain hian a thiam-na tak tak a la lantir lo. Chutih-rualin captain Edu-a chevel hi a hmuhnawm a, minute 90 chhunga hmuhnawm ber erawh vice captain Abhisek Haldar a ni.

Paul Pogba hminglem an vuah Abhisek hi hmun tinah a awm emaw tih tur khawpin a tlan tam a, inkhel entute lawm a hlawh hle.

AIFF Under 19 player
ṭhenkhat (Mizo ni lo) training-naa
ṭha tak ni si, inkhel taka an theihna an lantir thei lo chu coach Floyd Pinto tan pawh a luhaithlak ang. Vawiin hi match hnihna a ni tawh dawn a, Lammuala an tlangnel theih chuan match hmasa aiin an hmuhnawm zawk ang.

Tawnhriat nei ṭha rual

Chanmari West FC-in MPL-a hming langsar tak vek starting XI-ah an dah lut thei a, R. Laldanmawia leh Laldampuia ten an khelh ṭhat an chhunzawm thei a nih chuan AIFF Academy tlarhnung chuan hun harsa tak an hmachhawn dawn tihna a ni.

West Warrior hian season liam taa an player pawimawh Lallawmsanga Chhangte, Malsawmzuala, Benja-min Lalchhuanawma bakah an player thar Ramengmawia te Chhinga Veng an hmachhawn ṭumin bench-ah an ṭhuttir thei a, chu chuan an team ṭha zia a pholang.