AIFF U19 tan Chanmari West an u hret Mizoram Premier League ṭhatzia a takin kan hmu - Pinto
Mizoram Premier Lea-gue club Chanmari West chuan Laldampuia leh R. Laldanmawia goal hmangin AIFF Under 19 chu 2-1 in an hneh.
West Warriors hian I Day Football-ah point li hmu tawhin group A pahnihna an ni. AIFF U19 coach Floyd Pinto erawhin an hneh loh club Chanmari West leh MPL a fak thung.
Nimin Lammuala inkhelah AIFF U19 tan Lunglei rawlthar Lalengzama Vanchhawng-in ṭan aṭanga minute khat leh second 16-na lekah freekick
aṭangin pet lut mah se, Chanmari West-in Chhinga Veng an draw ṭuma goal khungtu pahnih Danmawia leh Dampuia-te hmangin an chhang let.
AIFF U19 hian an match hmasa berah I Day Football champion lai Aizawl FC 0-2 a an hneh loh tawh bawk avangin semifinal beiseina la tawp chiah lo mah se kawng a ping tluk a ni tawh, an match hnuhnung pahnihah Chanmari FC leh Chhinga Veng an hmachhawn dawn avangin an kawng a awlsam tawh dawn lo.
A goal mawi
Inkhel ṭan phatah AIFF U19 lamin goal an nei nghal. An match hmasa zawka inkhel bul ṭan lo captain Edmund Lalrindika chuan mual veilam sirah ball la lutin Chanmari West defender Racy K. Lalrem-mawia lakah freekick a hlawh chhuak a, Engzama ball pet ṭha zet chu West Warrior keeper Lal-mal-sawma Hmar-in a dang thei lo.
AIFF U19 boss Floyd Pin-to-a'n Mizo pathum Edu, B. Lalnuntluanga leh Rohming-thanga Bawlte te chu hma tawngah dahin Engzama'n mid-field aṭangin a thlawp a, Aizawl FC hmachhawntu Zonumawia bakah Lal-lian-sanga leh Joseph Lal-sanglura te chu bench-ah
ṭhuttir an ni thung.
Tlarhma lama Mizo rawl--tlarte an hmuhnawm a, midfielder Abhisek Haldar leh Engzama ten ball an chang tamin inkhel an thunun. Mahse, goal hmaah an hriam tawk lo thung - Lunglei rawlthar Tluanga'n a hun ṭha neih ṭum hnih a hlah bakah Edu-a'n goal zawnah a pet thei bik lo.
Hei le Warrior...
Chanmari West an awm mai mai lo. Minute 35-naah corner aṭanga ball lo kal chu Lalbiakhlua'n vengtu nei lo Danmawia hmaah a tauh thla a, MSL1 best player hian keeper Jafar Mondal dan hman lohin mawi taka volley lutin an si phurh a sut.
H.C Zarzoliana naute an phur thar a, point khata lungawi an tum tawh lo tih a chiang. Midfielder Lalmuansanga chu en maiin lian lo mah se, khelmual chhungah palian a nih zia lantirin an khingpuite ball a chhuhsak fo bakah tlar hma lama awm Lallianzama a thlawp ṭha hle.
MPL5 khel tura in-buatsaih mek Chanmari West player-te chevel a hmuhnawm a, Muansanga, Lianzama, Hlutea leh Dan-mawia ten AIFF U19 tlarhnung an su tlang teuh ṭhin hle.
First half tawp hma chiahin captain Dampuia chuan penalty box pawn chiahah freekick a hlawh chhuak, Chhinga Veng laka goal hnih khungtu winger hian ama freekick hmuh chu chhawr ṭangkaiin goal kilah mawi takin a pet lut.
Second half-ah AIFF U19 lamin an si phurh sut tumin an bei let a, captain Edu leh Tluanga ten mawi taka ball an inpek kual hnuah Hminga'n a hmawr a bawk fuh thei lo. Lunglei rawlthar Edu-a hian defender a bum hnuah hnai set sawt aṭangin goal-ah pet mah se Chanmari West keeper Malsawma ṭhatzia lantirtu mai a ni.
Chanmari West hian an match hmasa zawka an tihsual an insiam ṭha a, hma an hruai hnuah an tlarhnung an chesual tawh lo.
Goal khung belh aia neih sa hmanga point thum hmu thei tura a naute remkhawmtu coach Zara a fakawm. AIFF lam hian awmze neiin ball pet mah se dinhmun ṭha lo zawka an din hnuah an khingpuite lehthal turin an rilru a la paukhauh tawk lo tih a hriat theih.
Eng nge an sawi?
Chanmari West coach Zara chuan, "Kan khingpuite kha team ṭha tak an nih avangin inkhelh chhung zawng khan kan fimkhur hle. Ka nauten point thum kan mamawhzia an hria a, chumi hlawh chhuak tura an khelh chhuah theih avangin ka lawm a, fak an phu," a ti.
Zara hian season hmasaa a enkawl Chanmari FC leh Ai--zawl FC hmachhawn tura ngawrh taka inbuatsaihna an neih chhunzawm tur thu a sawi tel bawk.
AIFF U-19 coach Floyd Pinto chuan, "Kan naute hi ball pet thiam tak tak ni mah se kum naupang te te lakkhawm an ni a, tun season-a an tournamnet khelh hmasak ber a nih avangin an tan a la harsa, hmasawnna tur kan la ngah a, kan tihsual aṭangin kan inzir zel ang," tiin a sawi.
Mizoram league sang ber fakin Pinto chuan, "Mizoram-ah league ṭha tak a awm tih kan hria a, a takin kan hmu ta a ni. Chanmari West kha an khel
ṭha ka tih bakah an player-te an huaisenin an tumruh bawk, an lak aṭangin zir tur tam tak kan nei," tiin Vanglaini palai a hrilh.
I Day Football - Group A
RESULT, Fixture & Standing
Nimin Inkhel Result
Chanmari West FC 2 -1 AIFF Under 19
CWFC : R. Laldanmawia 35'; Laldampuia 44'
AIFF : Lalthanzama Vangchhia 2'
August 4, Ningani
12:00 PM Aizawl FC FC Vs Chhinga Veng FC
TEAM DINHMUN
# Team Pld W D L GF GA GD Pts
1 Chanmari FC 2 2 0 0 4 1 3 6
2 Chanmari West FC 2 1 1 0 5 4 1 4
3 Aizawl FC 2 1 0 1 3 2 1 3
4 Chhinga Veng FC 2 0 1 1 3 5 -2 1
5 AIFF Under 19 2 0 0 2 1 4 -3 0