Real, Gladbach, Inter, Shakhtar An hma hun a chiang lo vek!

Champions League group ngaihnawm bera chhal ngam chu group B a ni a, he group-ah hian Real Madrid, Borussia Monchengladbach, Inter Milan leh Shakhtar Donetsk an awm.

Team pali hi Champions League last 16 lut thei dinhmuna la ding vek an ni a, zanin dar 1:30-a inkhel result-in European club langsar pali hma hun a chingfel dawn. 

Real Madrid-in La Liga lamah beisei an phak lo a, Champions League-ah thawnthu a danglam lo - zanin dar 1:30-ah Gladbach an mikhual ang a, last 16 lut chiang turin hnehna chan an mamawh. 

Gladbach tan last 16 lut turin point hmuh a tawk a, dar 1:30-ah vek a thiam 16 zinga tel tura chak mamawh Inter Milan leh Shakhtar Donetsk an inkhel bawk ang.

Real Madrid hi La Liga table lamah palina an ni mek a, Champions League-ah lah table-ah pathumna an ni mek bawk - season an hmang ṭha lo hle. 

La Liga lamah 2-1 a Alaves an ngam loh hnuin an hneh tura ngaih Shakhtar chu Champions League lamah 2-0 in an ngam lo zui a, kartawpah insiamṭhain Sevilla chu 1-0 in an hneh thung. 

Real boss Zinedine Zidane chuan, "Tun hnaia kan hun tawnte a harsa em em a, mahse he team hi huaisen tak kan nih avangin chona hmachhawn hi nuam kan tih zawng a ni," a ti a, an insiamṭhat tur thu a sawi. 

Zidane hian Sevilla an hneh hnuah, "Kan khelh ṭhat loh chuan sawiselna kan tawk dawn tih kan hria a, a pawimawh ber chu hnehna chan kan chhunzawm hi a ni," a ti a, Zidane hian a ban loh tur thu a lo sawi tawh bawk - coach-in an ban loh tur thu an sawi chuan an ban a hnai tihna a ni a, zanin result hian French manager hma hun a hril thui viau ang. 

Real Madrid-in German club an mikhual hmain chanchin lawmawm an nei a, hliam vanga a chawlh hnuah captain Sergio Ramos chuan training a zawm leh tawh - Ramos-a awm chuan Real an danglam ṭhin, tih chu a hretute kan ni. 

Dani Carvajal-a'n training a zawm ve leh tawh bawk a, a inlan theih erawh a la rinawm chiah lo. Season hmasa lama Real Sociedad star player ni thei Martin Odegaard-a'n dam lam a pan zel bawk a, Eden Hazard erawh hliam vangin in lum aṭanga a ṭhiante a ṭawiawm a la ngai chhunzawm zel dawn niin a lang. 

Gladbach tan centre back pahnih Nico Elvedi leh Tony Jantschke an inlan theih a rinawm loh a, Karim Benzema tan hna a awlsam sawt dawn tihna a ni thei ang. Covid-19 vanga chawl mek Ramy Bensebaini a inlan thei dawn 

lo bawk. 

Hetihlai hian Marcus Thuram chu an league match hnuhnung bera Freiburg nen 2-2 a an inhnehtawkna inkhelah bench-ah a ṭhu leh tawh a, tun season match 16-a khelha goal li leh assist pasarih nei thei lo kir hi German club tan chanchin lawmawm a tling - tun season match 13-a khelha goal sarih leh assist paruk nei thei Alassane Plea hi Real tlarhnung tan theihnghilh loh a ṭha bawk ang. 

Group B-a dinhmun duhawm lo ber chu Inter Milan an ni a, Italian club hian zaninah Shakhtar an hneh a nih pawhin midang result-ah an innghah tel a ṭul - hnehna an chang a nih pawhin Real leh Gladbach inkhelah chak zawk an awm a la ngai cheu. 

Inter hian group stage match nga an khelh tawhah vawi khat chaih chak an la nei ve a, an ropui lo hle. Serie A table-a pahnihna ni mek team hian Ukraine-ah Shakhtar hi goal khung loin an inhnehtawkpui tawh a, an khelmualah chuan hneh ngei an tum ang. 

Italian club tan midfielder Radja Nainggolan leh Matias Vecino-te an inlan theih a la rinawm loh a, Gladbach laka hrem vanga inlan thei lo Arturo Vidal chu a lo kir leh thei tawh dawn bawk. 

Inter tan Romelu Lukaku leh Lautaro Martínez bawk chu innghahna tur an ni leh dawn a, Lukaku hian tun season match 13-a khelhah goal 12 khungin assist vawi hnih a nei tawh - Martinez hian tun season match 15-a khelhah goal ruk khungin assist vawi thum a nei tawh.