Chamberlain tan kum pawimawh - Wenger

A khup hliam a dam hnua par chhuak leh mek Alex Oxlade-Cham­berlain tan kumin hi kum pawimawh a nih tur thu Arsenal manager Arsene Wenger chuan a sawi chhuak.

Kum 22-a upa Chamberlain hi kumin February thla a Barcelona nen Champions League-a an inhmachhawn ṭumin a inhliam a, Euro 2016 pawh a khelh theih loh phah. England international hi tunah chuan dam tawhin season thar inbuatsaihnaah a che ṭha hle a, match thum a khelh aṭangin goal hnih a khung.

Arsenal midfielder hian French club Lens an draw ṭumin goal khat a khung a, United States lamah MLS All Stars nen an inkhelh
ṭumin minute 45 khelh tir ni lehin an match hnuhnung zawkah chuan minute 70 chhung ṭha taka khel thei tawhin Chivas de Guadalajara 3-1 a an hneh theih nan solo goal ropui a khung - he inkhelah hian Gunners defender thar Rob Holding-a'n goal a khung ve bawk.

Chamberlain chungchang sawiin Wenger chuan, "Hun rei tak chhung a inkhel thei lo a, a tan season pawimawh bik a ni dawn. Team tana thahrui pawimawh a ni tawh a, engtiang taka ṭhain nge a khelh theih hi a la inhre lo zawk hial mai thei a, chuvangin a theihna sanzia pholang turin a tan kum pawimawh tak a ni dawn," tiin a sawi.

Chivas an hmachhawn ṭuma inlan lo Jack Wilshere chungchang sawi zuiin Wenger chuan, "Jack hian a keah hliam tenau a nei a, tun kartawpah erawh kan zingah a tel theih ka beisei," a ti. Hliam dam hlim Santi Cazorla erawh inkhel thei turin a dinhmun a ṭha tawh.

Season thar inbuatsaih nan tunkar tawp hian Arsenal hi Norway leh Sweden-ah an la kal leh dawn a, he hunah hian Viking FK leh Man­chester City an hmachhawn ang, hemi hnu hi chuan Premier League-a an match hmasa ber atan August 14 khian Emirates Stadium-ah Liverpool an lo mikhual tawh dawn a ni.

Tun dinhmunah Gunners hian an player ṭhenkhat chu international match an khelh avangin an la chawlhtir a, Euro 2016-a Wales midfielder pawimawh Aaron Ramsey leh Copa America best player Alexis Sanchez te chuan tunkar chhung hian team an zawm tawh ang. French international Olivier Giroud leh Laurent Koscielny bakah Germany midfielder Mesut Ozil te erawhin team training an la zawm dawn rih lo thung.

French manager Wenger chuan, "Tunkar chhungin player ṭhenkhat an lo kir tawh dawn a, Ramsey leh Sanchez ten min rawn zawm ve tawh ang. Mahse, Ozil, Giroud leh Koscielny te erawh kan la hruai ve dawn lo thung. Anni pathum tih loh hi chu kan kim tawh ka beisei," a ti.

Arsenal manager Arsene Wenger chuan season thar atan player lakluh tur zawnga an la hawi kual reng thu a sawi chhuak. French manager hian a naute chu season thar inbuatsaihna ṭha takin neih pui thei mah se league leh Europe-a champion tur chuan an la ṭha tawk loah a ngai ngei niin a lang.

Player thar?

Tun nipui chhungin Gunners hian Bundesliga club Borussia Monchengladbach aṭangin mid­fielder Granit Xhaka an lalut tawh a. Leicester City striker Jamie Vardy an sawm chhuak thei lo a, tun hma lam aṭang tawha an beisei ve reng ṭhin Napoli hmatawng Gonzalo Higuain chuan Juventus a pan san tawh bawk.

Wenger chuan, "Tunah hian tlarhma leh tlarhnunga awm tur player kan la zawng reng, a buaithlak lai chu kan club chauhin player kan zawng lo hi a ni," tiin club dang aia sum an thehchhuah tam ngam loh ṭhin vanga an player duh an lak theih loh thu a sawi.

French manager hian kartawpa Leicester leh Paris St-Germain te inkhel kha a en a, Foxes duhlai Riyad Mahrez a thlithlai ngei nia rin a ni. Algeria international winger bakah hian Lyon striker Alexandre Lacazette leh Inter Milan striker Mauro Icardi te nen sawi zawm an ni.

Wenger hian defender thar lei ngei a tum thu sawiin, "Player kan lei belh ang a, kan team tichak thei tur a ni thung ang. Player lei ngei turin min nawr fo a, tu nge kan lei ang tiin zawt let ila chhanna an nei hleithei ngai lo," a ti. London club hian German defender Shkodran Mustafi chu Valencia aṭangin lakluh an tum niin sawi a awm bawk.

Arsenal hian tuna an hel lai te hi awlsam takin an la chhuak maiin a rinawm loh a, kum 25-a upa Lacazette lei nana pound maktaduai 29 vel an thehchhuah chu Ligue 1 club hian an lo hnawl sak tawh. Hei bakah hian Lyon president Jean-Michel Aulas chuan an player duhlai hi contract thar duhawm tak an sihhmuh tur thu a lo sawi chhuak ve bawk.

Hetihlai hian Foxes manager Claudio Ranieri chuan Mahrez tan club dang zawm a hun loh thu leh King Power Stadium-a cham zel chu a tan a ṭhat ber thu lo sawi tawh mah se thu dang a nei ve leh ta!

Chelsea manager hlui chuan, "Tun dinhmunah Riyad hi a chunga boruak hrang hrang awm hian a tibuai deuh niin a lang, a tana pawimawh ber zawk chu a taksa a fit ṭhat a ngaih bakah season thara kan player pawmawh nih chhunzawm tura intuaihriam a ni." tiin PFA Player of the Year award dawngtu chungchang a sawi - Mahrez hi kum 2019 June thla thleng cham turin Leicester-ah contract a nei mek.