West Bengal sorkain football a tanpui dawn
Kolkata club lian East Ben-gal chuan August 1, Thawhṭanni khan an club din cham vawi 97-na an lawm a, he hun hmanpuitu West Bengal chief minister Mamata Banerjee chuan Kolkata club 13 hnenah sorkarin nuai 50 ṭheuh ṭanpuina a pek tur thu a puang.
East Bengal dincham lawmnaa khuallian 'Didi' tia an koh ṭhin Mamata Banerjee chuan, "Kan khawpuia football club tam tak ten sum vangin harsatna an tawk mek a, sum kan neih tlem zia hre reng chungin sorkar hnuaia football club ni lo club pangngai 13 hnenah nuai 50 ṭheuh kan pe dawn a ni," tiin a puang a, pawisa hi kum 2016 leh 2017-ah pek an ni dawn tih a sawi tel bawk.
State Assembly leh Lok Sabha-a an party Trinamool Congress kaltlanga in candidate tura India captain hlui Baichung Bhutia lo sawm thlu tawhtu Mamata Banerjee chuan sawi chhunzawmin, " Kan sports minister Aroop Biswas hnenah experts committee dina kum 10 chhunga kan state-in infiamnaa hma kan sawn theihna tura ruahmanna siam turin ka hrilh tawh. Kan bul ṭanna atan football hi ka duh a, heng sumte hi eng ang takin nge hman a nih chu kan enchhin zel dawn a ni," a ti.
Nuai 50 ṭheuh club 13 hnena semah Mamata Banerjee-i'n a duhtawk mai lo. Kum 61-a upa politician chuan East Bengal khelmual siamṭhat mek an puih tur thu sawiin, "East Bengal stadium-in chei ṭha mek tih ka hmu a, Floodlights te pawh dah a ni dawn. Sorkar chuan rang zawka he stadium hi sak zawh a nih theih nan East Bengal hnenah vaibelchhe hnih a pe dawn a ni," tiin a puang bawk.
Trinamool Congress hotunu chuan nakkuma India-in World Cup Under 17 a thlen tur thlirlawkin, "Under-17 World Cup thleng tur state zingah kan tel a, hei hi West Bengal tan chuan inchhuanna tham a ni. Football hi kan thisenah a bet tlat a, Bengal aṭang hian engah nge Maradona, Ronaldinho leh Lionel Messi te neih theih loh bik ang?" tiin zawhna a siam a, an state aṭangin footballer
ṭha zawk an chhuah zel a beisei.
Mamata chuan hmalam pana ke pen a pawimawh thu sawi nghalin, "East Bengal hian kum 100 a tlin hunah sorkar chuan ropui taka lawmsak a tum a ni. Eng nge kan lo tih tawh loh? tih lam inzawt loin kan hmalam huna kan tih theihte kan inzawt zawk tur a ni," tiin football hmasawn nan theihtawp chhuah a tum.
East Bengal dincham lawm-naah hian Bharat Gaurav (pride of India) chawimawina chu intlansiak chak hmingthang Milkha Singh hnenah pek a ni a, East Bengal legend Shyam Thapa leh Shyamal Ghosh te hnenah lifetime achievement awards pek niin South Korean forward Do Dong Hyun chu footballer of the year chawi-mawina pek a ni bawk.