Bengaluru-in Umut Bulut an beisei

I-League champion Bengaluru chuan season thar atan Turkish forward Umut Bulut an beisei niin Turkish media-te chuan an tarlang a, Indian club hian Gala-tasaray forward manah hian pound maktaduai 2.53 (vaibelchhe 22 bawr vel) an phal niin an sawi.

South Indian club hian I League-ah foreign striker hriam tak an nei hleithei lo a, an season hmasa pahniha an striker Sean Rooney chuan vawi 52 inlanah goal 15 chiah a khung a, season hman zawh taka an foreign striker Kim Song-Yong chuan goal nga chiah a khung bawk.

Kum 33-a upa Bulut hian Turkey tan vawi 36 inlan tawhin goal 10 a khung sak a, Galatasaray-ah season li hun a hman chhungin vawi 167 inlanah goal 43 khung sakin league nomawi pahnih bakah Turkish Cup vawi thum a chawipui tawh bawk.

Champions League-a Juventus leh Real Madrid lamah pawh goal lo khung tawhtu Bulut hian a vanglai hun erawh Trabzonspor-ah a lo hmang tawh a, Turkish club tan hian vawi 197 inlanah goal 88 a khung thei a ni.

Bengaluru hian AFC Cup quarterfinal-ah Tampine Rovers hmachhawn an la hmabak a, Ashley Westwood-a'n a chhuahsan hnuah hmasawn tumin an bei ngawrh hle.

Barcelona assistant manager hlui Albert Rocca chu coach atan an ruai a, Spanish coach hian a hunlaia Barca coach Frank Rijkaard-a'n Catalan club a chhuahsan hnuah Galatasaray-ah assistant a nih chhunzawm. Turkish club nen hian an lo inhmelhriat ṭhat tawh avangin Bulut leh Bengaluru sawi zawm an ni pawh hi a mak lo.