Hull City dilna Wales-in an hnawl

Premier League kai thar Hull City chuan an boss Steve Bruce-a'n a chhuahsan hnuah a thlakna tur an zawng mek a, Manchester United captain hlui thlak tur hian Wales coach Chris Coleman duh mah se Football Association of Wales chuan an coach biak phalna hi Hull hnenah an pe duh lo.

Euro 2016 khelh zawh taka semifinal thleng Wales hruaitu Coleman bakah hian Everton ban tak Roberto Martinez leh United States coach hlui Bob Bradley-te chu Hull enkawl thei tura hming lamrik zinga mi an ni.

Kum 46-a upa Coleman hian Premier League club a enkawl hnuhnung ber chu kum 2007 daih tawh khan a ni a, khatih hunlai khan Fulham coach a ni. 2018 World Cup chu Wales a kaihhruai hnuhnung ber tur a nih thu a lo sawi tawh bawk.

Coleman hian Wales a enkawl tirhin an match hmasa paliah tlawmpuiin an ram chanchina coach bul ṭan chhe ber ni mah se a insiamṭha thuai a, Euro 2016 kha kum 58 hnua Wales-in inelna lian thaan an hmachhawn leh hmasak ber a ni.