Arsenal hnar vanga inchhir lo Vardy

Leicester City striker Jamie Vardy chuan Arsenal sawmna a hnar chu a inchhir loh thu sawiin a hunlaia England manager Roy Hodgson pawhin duhthlanna dik tak a thlan thu a hrilh niin a sawi.

Kum 29-a upa Vardy hian season hman zawh takah khan Premier League goal 24 a khung a, Euro 2016 khelh ṭan a nih hma khan Arsenal chuan pound maktaduai 20-in lakluh an tum a ni.

England international chuan, "Arsenal ang team ṭhain min duh tih hriat kha chu a lawmawm a, mah se khawi hmun dangah mah kal ka duh lo. Leicester-a kan inlungrualna leh thawhhona ang hi khawi hmun dangah mah a awm lo a, chhuahsan phal chi a ni lo," a ti.

Arsenal-in kar khata £120,000 hlawh tura an sawmna hnara Foxes tana £100,000 hlawh tura contract thar ziaktu striker chuan sawi chhunzawmin, "Leicester-ah hian hnathawh zawh loh tam tak kan la nei a, kan hmabaka thil thleng theite ka ngaihtuahin contract thar ka ziak hi inchhirna ka nei lo," tiin King Power stadium-a a cham chu a inchhir lo hle.