I Day Football 2016 Mikhual Shillong Lajong an thiam

Shillong Lajong-in I Day Football khel turin naupang rual rawn hruai mah se khelmual chhungah erawh an naupanna leh mikhual an nihna hmuh tur a awm lo a, Ramhlun North lakah team ṭha zawk an nihzia an pholang - MPL kaithar club hian inzirna tur an la ngah tih 4-1 in a hrilhfiah.

Meghalaya club hian an zir ang thlapin an khel emaw tih mai tur a ni a, Ramhlun North-in an hun ṭha neih an khawhral fo laiin I League club hian an hun neih chhun an chhawr
ṭangkai thin a, hei hi MPL kai hlim club leh I League club inthlauhna chu a ni.

Tute nge inlan?

Shillong Lajong coach Thangboi Singto-a'n chesual thei an ni tih hriain fimkhur takin a naute a remkhawm a, 4-2-3-1 formation hmangin Milan Singh chu tlarhmaah a maltlat a, Assam striker thlawp turin a hnung chiahah Mizo rawlthar Samuel Lalmuanpuia awmin winger tlan chak pahnih Bipin Singh leh Alen Deory te dan tum chu Ramhlun North tlarhnung tan hna awlsam a ni lo.

Ramhlun North-in 4-4-2 formation hmangin tlar hmaah Zo United an hmachhawn
ṭuma winger Vanlalthlamuana chu B. Malsawmzuala nen an inkawptir a, Ramhlun North coach Lalruatliana Sailo-in team ṭha lo zawk an nih pawm duh loin defensive game khelh a tum bik lo tih a lang.

Lajong game a mawi

Ṭan aṭanga minute khat pawh a tlin hmain Lammuala tlangnel zawk Ramhlun North-in hun
ṭha nei mah se winger Jerry F. Zonunsanga a hriam tawk lo a, an hun ṭha neih engmah lo maiah a chantir - hei hi Ramhlun North vanduai in-
ṭanna chauh a ni.

Minute riat liam hnuah Zema-bawk North forward Samuel-a'n Ramhlun North penalty area-ah mawi takin ball a lalut a, Bipin Singh-a'n goal-a lo chantir turin harsatna a nei lo. MPL club-in goal khung ngei tumin nawr ṭhin mah se Lajong nawr let an dawl zo lo ṭhin a, mikhual tlarhma an hlauhawm thei hle.

Ramhlun North-in goal khung ngei tumin nawr ve reng mah se goal hmaah an hriam tawk lo a, winger David Lalrinchhana, Thlamuana leh Jerry-a ten an in-
ṭhelh chhawk hnuah Lajong an inlar a, minute 43-naah winger Alan Deory-a'n mar kawh pawtin a pet goal a, an hun ṭha neih an khawhral ve duh lo.

Samuel-a 'show'

Inkhelh ṭan hmaa sawi hlawh ber chu Lajong striker Milan Singh a ni a, mah se inkhel a zawh meuh erawh chuan Mizo rawlthar Samuel Lalmuanpuia a langsar ber a, a hmuhnawm tel bawk.

Zemabawk North rawl-thar duhawm hian minute 11-naah goal hlauhawm ni pawha lang loah ball a insiam rem a, yard 25 vela hla aṭangin a pet lut. Ramhlun North player-ten mawi ti taka enliam bak tih theih an nei lo.

Si thum an phurh hnuah pawh tlawm tum loin Ramhlun North-in striker MC Malsawmzuala an luhtir. Mahse, goal khungtu erawh Lajong bawk an ni a, defender Nim Dorjee-a'n corner aṭanga ball lo kal chu an goal lina turin a tauh lut.

Hun tawp hma minute sarih la awmin Vanlalthlamuana'n Shillong club tlarhnung a pal darh hnuah MC-a'n awlsam takin goal khat khung ve mah se Ramhlun North-in goal an chhuah hnem hret a, insiamṭha turin hunin a daih tawh lo.

Eng nge an sawi?

Ramhlun North coach Tawia chuan,"Shillong Lajong an nih avanga hlau lo turin kan infuih a, ka nauten an theihtawp an chhuah. Kan hun ṭha neih kan chhawr ṭangkai thei lo a, chuti ni lo se inkhel result kha a danglam ngei ang. Thla khat chauh kan la awm ho a, chak taka kal nghal mai theih a la ni lo. Goal li chhuah mah ila match hmasa aiin hma kan sawn zawk a, kan inkhelh leh hunah pawh hmasawnna hmuh tur a awm ang. Kan buaina ber chu counter attack kan dawl zo lo ṭhin kha a ni a, kan insiamṭha thuai ang," tiin Vanglaini palai a hrilh.

Shillong Lajong coach Thang-boi Singto chuan, "Team naupang tak kan ni a, senior team hminga lo kal ni mah ila ka player ṭhenkhat chu kum 18 hnuai lamte an la ni hlawm. Kan zir dan ang takin kan khel chhuak a, match hmasa aṭangin hmasawnna hmuh tur a awm a, chu chu ka lawmna a ni. Kan team hmachhawn turte hi keini chuan kan la hmelhriat loh zel an ni a, chanchinbu aṭangin eng team nge an nih hi kan hre ve chauh zel a ni. Hmasawnna chu hmuh tur a awm zel ang, " tiin team naupang tak ni chunga a naute khelh danah a lawm thu Vanglaini palai hnenah a sawi.

I Day Football - Group B

result, Fixture & Standing

Nimin Inkhel result

Ramhlun North 1 - 4 Shillong Lajong

RNFC : MC Malsawmzuala 83'

SLFC : Bipin Singh 8'; Alen Deory 43';

Samuel Lalmuanpuia 56'; Nim Dorjee Tamang 76'

August 4, Ningani

2:45 PM Bethlehem VT Vs Zo United FC

TEAM DINHMUN

# Team Pld W D L GF GA GD Pts

1 Shillong Lajong 2 2 0 0 6 2 4 6

2 Zo United FC 2 1 1 0 1 0 1 4

3 Dinthar FC 2 1 0 1 1 1 0 3

4 Ramhlun North FC 2 0 1 1 1 4 -3 1

5 Bethlehem VT FC 2 0 0 2 1 3 -2 0