Higuain thlak nan Milik

Napoli-in pound mak-taduai 75.3-in an rinrawl Gonzalo Higuain chu an hmelma leh elpui Juventus hnenah an hralh a, Argentine forward thlak nan Arkadiusz Milik chu Ajax aṭangin an lalut. Polish striker manah hian Serie A club hian pound maktaduai 30 bawr vel an seng niin tarlan a ni.

Euro 2016 khelh zawh takah khan Milik hi Poland innghahna a ni a, an match hmasa bera Northern Ireland an hneh ṭumin goal awmchhun a khung a. Quarterfinal-a champion zui ta Portugal an hneh loh ṭumin penalty shootout-ah goal a khung leh bawk. Season liam ta khan Ajax tan league-ah goal 21 a khung a, chutihrualin season chawhnu lamah chuan khelhna hmun nghet a chang pha chauh.

Kum 22-a upa Milik hian Polish club Rozwoj Katowice leh Gornik Zabrze tana a khelh hnu-in kum 2012 khan Bundesliga club Bayer Leverkusen zawmin Germany-ah a hlawhtling lo a, khawvel hriat a rawn larna chu Ajax-ah a ni.

Milik chuan, "Napo-li ka zawm thei hi ka in-chhuang hle a ni. Sul-hnu ropui tak leh supporter
ṭha tak an nei a, mipui tih lawm hi ka tum dawn a ni," tiin a sawi. Napoli hian an player thar hi jersey 99 an haktir dawn a, Higuain-a kalsan tak jersey number 9 a la awl. Hei vang hian Italian media te chuan Argentine forward thlakna tura Napoli lak tum ber chu Inter Milan striker Mauro Icardi niin an tarlang.