Pep vangin City ka zawm - Sane

Germany midfielder Leroy Sane chuan Schalke aṭangin pound maktaduai 37-in Manchester City a zawm ta a, kum nga daih contract ziakin a chetṭhat dan a zirin a man zat hi a la pung chho thei ang. Kum 20-a upa Sane chuan club official website in a kawmnaah Pep Guardiola vanga English club zawm a nih thu a sawi.

City manager Pep Guardiola chuan, "Talent danglam tak nei a ni a, player hmuhnawm tak a nih bawk avangin fan-te thlir duh zawng tak a nih ngei ka ring. Leroy hian theihna sang tak a nei a, ball a thiam em em a, khelmual chhunga a chet danah hian ngaihsanna tur tam tak a awm a ni. Player tlan chak tak a nih bakah ṭhiante siam sak nuam a ti a, team tana a thawhrim bakah goal a khung thei bawk. Kum 20 leka upa ni mah se Germany tan a khelpha tawh a, club tan ro hlu tling a ni," tiin an player thar a fak thiam hle.

Sane hi Euro 2016-ah Germany squad-ah telin semifinal-a France an hneh loh ṭum chauhin bench aṭangin a rawn lut a, amaherawhchu Bundesliga-a amah lo hmu tawhtu Guardiola hian a hnualsuat phah lo. German midfielder hian Schalke-in Bundesliga-a pahnihna an nih theih nan match 33-ah goal riat a khung a, match khat chiah a awl.

Kum 20-a upa Sane chuan, "Guardiola hian player ṭha zawkah min siam theih ngei ka rin vangin City hi zawm ka ni. League thar zawm ka nih avangin insiamrem turin hun ka mamawh ka ring a, amaherawhchu rang takin ka theihna ka lantir theih ka beisei," tiin a sawi.

City hian tun season-ah Bo-russ-ia Dortmund aṭangin Ilkay Gundogan, Celta Vigo aṭangin Nolito leh Ukrainian club FC Ufa aṭangin Oleksandr Zinchenko te an lalut tawh a, Sane hi an player lakluh palina a ni. Guardiola hote hian Everton aṭangin John Stones lakluh an beisei leh mek a, amaherawhchu Toffees beisei zat pound maktaduai 50 an la hmang ngam rih lo a, English defender lakluh nan pound maktaduai 40 leh a chet ṭhat dan a zira pawisa pek belh erawh an huam niin sawi a ni.