Rawlthar hmanga chak tum Klopp

Liverpool chuan zanin dar 11:25 hian Champions League match khel turin Midtjylland an lenchilh dawn a, last 16 an luh chian tawh avangin Reds tan inkhel pawimawh a ni tawh lo. 

Midtjylland-in beisei tur an neih tawh loh bawk avangin inkhel hmuhnawm beisei a harsa a, hetihrual hian Liverpool boss Jurgen Klopp chuan chak tuma inkhel an hmachhawn tur thu a sawi. 

German coach chuan, "Match tawp bera inkhel result-in kan dinhmun a tih danglam lohna tur hmasa ber a ni a, kan dinhmun chiang taka thlir thiam a ngai. Chutihrual chuan Liverpool kan ni a, chak loh kan duh lo," a ti. 

Liverpool-in player hliam an ngahzia chu tlang hriat a ni a, fixture a hautak bawk avangin Klopp hian player naupang zawk a chhawr ngei erawh a rinawm thung. 

Klopp chuan, "Kan squad enin player an naupang sa a, kum naupang tak player hi panga emaw paruk vel kan hmang tawh hial ang. Inlan tur chungchangah thutlukna ka la siam thei lo a, ka ngaihtuahnaah erawh player zawng zawng an tel vek thung.

"Inhliam kan ngah a, mahse hei hian midang tan kawng a hawn ve tho. Chutihrual chuan player chhawr tur thlir thiam a ngai tel a, tun dinhmunah chuan Rhys-a'n a ti ṭha a, Neco hian a zawnin game hnih a khel ta a, Curtis lah kum 10 vel inkhel tawh ang mai a ni a, Caoimhin lahin chance a nei ṭha em em bawk," tiin a naute a fak.

Klopp hian fixture hautak thu a sawi zui bawk avangin naupang rual hi a chhawr a nih pawhin a mak lo ang. Group D inkhel dangah Atalanta chuan zanin dar 11:25-ah vek Ajax an lenchilh dawn a, inkhela chak zawkin last 16 an lut ang.