Triau Trackx Mizo takin lungtat an partir dawn

Album an tihchhuah hnuah an thawm a reh rih viau a, mahse hei an reh hlen dawn lo tih lantir nan music video thar an siam leh a, an music video thar tur hi a Mizo dawn hle a, Mizo tumrik hrang hrang pawh an hmang.

Triau Trackx music video thar tur hi 'Lungt‚t par' a ni a, a genre erawh rock a ni lo a, pop a ni lo a, punk pawh a ni hek lo; sawi mai theih ni lo genre a ni ber a, chutihrual chuan ngaihthlak rualin Mizo siam a ni tih a hriat hle ang.

Triau Trackx-a an otupa Ramenga chuan, "Hmanlai dueh ngaihtuah chhuak uai uai thei tur khawpin a record dan pawh kan tidanglam dawn. 3Band tape recorder-ah guitar te pawh record vek kan tum a, khuang te, seki leh darkhuangte pawh hman kan tum a, mahse a inhmeh lo hle erawh chuan kan hmang leh lo ang," a ti.

Hetiang a nih dawn avang hian ṭhing uih tak anga ngaih tur erawh a ni lo. "Hla tunlai tak, a rem dan hmanlai tak a ni dawn. Vawi khat ngaihthlaka zawm ve nghal theih tur chi hla, catchy deuh tur a ni," tiin Ramenga hian a sawi. Triau Trackx hian band ang chuan hnuhma neih tam an tum tawh hmel loh hle a, Ramenga vek hian, "Hla pahnih emaw vel chauh tihchhuah kan tum tawh avangin kan phur ang reng phian mai," a ti.

An sawi dan leh a hla kalhmang, music leh recording chungchang an sawi hian ngaihthlak a tichakawm nghal var a, amaherawhchu Aizawl lamah chuan TV lamah kan hmuh a rinawm loh. Ramenga chuan, "LPS leh Zonet a chhuah kawp theih loh kha pawi kan ti em em a, chuta kara member ni ve lote hla a pahniha a chhuak thei lo tur phei hi chu Zo rimawi hmasawn nana theihtawp kan lo chhuah vena rilru aṭang chuan na a tling kan ti," a ti a, Zorimawiin hma a sawn zel theih nan MZI leh MDM te an thawhhoa hma an lak dun theih an beiseipui tih a sawi. Hetihrual hian an rilru ang an put a, an lo tihchhuahsak duh a nih chuan an lawm hle tur thu a sawi. TV-ah a hranpain an pe chhuak dawn lo a, YouTube lamah an dah thung ang.