Chelsea number 1 keeper Mendy

Thawhlehni zan khan Chelsea leh Sevilla goal awm loin an inhnehtawk a, goalkeeper Edouard Mendy-a'n Nemanja Gudelj khung tur ṭha zetin a dang. Champions League group E inkhel dangah Rennes leh Krasnodar te 1-1 in an inhnehtawk.

Frank Lampard chuan, "Theihna a nei a, tun dinhmunah chuan number 1 keeper a ni. A khel ṭha em em a, clean sheet vawi hnih a nei der tawh," tiin inkhelh banah Mendy a fak.

Chelsea an inkhelh tawh chuan goal a lut ṭhin, Lampard-a awm hnuah 0-0 a inhnehtawk an la nei lo. Sevilla nen hian ram tana feh chhuahnaa inhliam Mendy a rawn let a, Senegal international hian pound maktaduai 71 man Kepa Arrizabalaga aiin rin a hlawh zawk.

Tlarhma lamah Premier League a goal khung zo hlim Timo Werner leh Kai Havertz bakah Mason Mount leh Christian Pulisic te an awm a, goal hmuh a beiseiawm. Amaherawhchu German forward Werner-a'n chance ṭha a hlah.

Kum 24 mi Werner hian keeper chauh a hmachhawn hnuah ball a la na hret a, a pet fuh tawk loh avangin ṭum hnih a chance ṭha a hlah. RB Leipzig forward hlui hi tlan chak viau mah se finishing lamah inzir belh tur a nei thung.

Sevilla-in Julen Lopetegui hnuaia an tih ṭhin dan angin ball an chang tam zawk a, amaherawhchu Thiago Silva hoa Chelsea tlarhnung inrem sut tlang an harsat. A tlang chhunah keeper Mendy-a'n a tihtur a ti bawk.

Minute 18-na lekah Nemanja Gudelj ball tauh chu Kurt Zouma-a'n dang perin Mendy che sawn mah se Chelsea keeper hian hmun himah ball hi a hui sawn hman a, hun pawimawha a chet dan avangin fak a hlawh hle.

Chelsea manager Frank Lampard chuan, "Sevilla hi team ṭha tak an ni a, result ṭha a ni. Goal kan chhuah loh hi kan tan chuan chanchin lawmawm a tling," tiin a sawi a, hma an sawn zel tur thu a sawi bawk.

Sevilla coach Julen Lopetegui chuan, "Point thum hlawh theih dan kan nei a, amaherawhchu point khat pawh hi a ṭha tawk viau e. Chelsea anga team ṭha hneh tur chuan player zawng zawng an chet ṭhat a ṭul," tiin a sawi.

Chelsea hian October 28, Nilaini zanah Russian club Krasnodar an hmachhawn leh dawn a, Sevilla leh French club Rennes te an inkhel bawk ang.