Kohli-a'n India a chhan zo lo

Australia-in nimin khan T20 match thum khelh tura a tawpna berah India chu run12-in an hneh.

India captain Virat Kohli chuan run 85 tehmeuh siam mah se Men in Blue hi a chakpui zo lo a, amaherawhchu match hmasa pahniha hnehna an chan avangin series 2-1 in an la.

Sydney Cricket Ground-ah India-in vawm hmasak an thlang a, Australia opener Mathew Wade-a'n run 80 zet a siam avangin chak turin an dinhmun a ṭha. Aussies tan Glen Maxwell (54) leh Steve Smith (24) te an che ṭha bawk a, over 20-ah run 186/5 an siam.

India bat hun a thleng a, opener KL Rahul chu run siam loin a thi. Shikhar Dhawan-a'n run 28 a siam a, captain Kohli-a'n ball 61 lekah run 85 mah se thlawptu an nei ṭha tawk lo.

Match hnihnaa India chakpuitu Hardik Pandya pawhin run 20 chauh a siam a, India-in over 20-ah run 174/7 chauh an tlin. Australia-in T20 match hnuhnung berah hnehna an chang.

India leh Australia hian December 17-21 chhung hian Test match vawi thum an khelh tura hmasa ber an khel ṭan ang.