Di hlui ngai lo Liverpool awmna chu a chung ber!

T-Melody zaipu Lalnunsanga'n "Lunglai hal vanga inṭhen mah hian suihlung len thar ni an nei,Duh tea ṭanglaia pawm tawh hnu nghilh ni a har an ti!" a tih vang vang kha chuan in lung a leng ṭhin - kan hre vek!

Ni e, Liverpool pawhin 'lunglai hal vang' ni hauh loin an hmangaih em em, an âtchilh rawn Jurgen Klopp kha an ṭhen a ngai a, German coach-in a chhuah tur thu a sawi ṭuma Liverpool fan-te ngui hmel takte kha aw!

Mahse, an rilru nat lai ber pawha Anfield lam hawi tlatte khan an beisei an hmu a, 'Di hlui' ngai loin an leng ta - coach thar Arne Slot-a hnuaiah Liverpool an kal zel a, Premier League table chung ber chu an awmna tura duan a ni.

Reds hian Pathianni zan khan team indinthar Chelsea chu 2-1 in an lo hneh a, Premier League hmahruaitu an nih chhunzawm - Reds tan Mohamed Salah leh Curtis Jones tan goal an khung a, Blues tana Nicolas Jackson-a goal khungin awmzia a nei phak lo.

Fiahna ngamtu

Slot-a hnuaiah beisei phak bakin season bul an ṭan a, heti chung hian Reds-in rin an hlawh lo - Chelsea an hmachhawn hma hian league match sarihah vawi ruk an chak a, an ngam loh awmchhun hi team tenau Nottingham Forest an ni.

Premier League table chung berah an ṭhu vung chungin, "Team ṭha an la hmachhawn lo alawm," an tihsak a, Old Trafford-a Manchester United meuh 3-0 a an sawp pawh tun laia United dinhmun nena hmeh belin, "A awm ve reng alawm," an ti a, fiahnaah an chhiarsak lo.

October hi Liverpool tana 'fiahna thla' ah anmahni pawh rawn chuang loin an puansak a, Chelsea hmachhawn zawh hnu lawk, Nilaini zan dar 12:30 Champions League-a RV Leipzig an lenchilh tur te, kartawpa Arsenal an lenchilh turte an thlirsak a, "Hei le, fiahna chu..." an ti.

Liverpool player leh fan ten chu fiahna chu lawm takin an pawm a, fiahna hmasa bera chhal ngam chu an paltlang phawt. Reds hian minute 29-naah Curtis Jones hmangin penalty an hlawh chhuak a, Mohamed Salah chuan goal-ah a chantir.

An nghing lo

Liverpool-in first half hun pek belhah Jones hmang vekin penalty an hlawh chhuakah an inngai a, mahse, video assistant referee (VAR) hmanga ennawn a nih hnuah referee John Brooks-a'n a thutlukna a sut a, penalty a pe lo.

Chelsea-in si hnih phur ngat se Anfield-ah 'comeback' a harsa sawt dawn tih a chiang a, an penalty chawi loh hi second half minute thumnaah an lawm nghal - Liverpool hnara Chelsea pantu Moises Caicedo-a ball siamsak chu Jackson-a'n um lutin goal-ah a chantir.

Jackson-a goal khung hi a tirah pawm ni lo mah se, VAR hmanga ennawn a nih hnuah pawmsak a ni ta thung a, Anfield a reh a, fan an ngui. Mahse, Chelsea hlim lai chu chhum rei lotê langa ral leh ang chauh a ni.

Blues goal khung aṭanga minute thumnaah Liverpool an inlar ve leh a, khel ṭha em em mai Jones chuan Salah-a ball siamsak chu goal-ah a chantir. Anfield an sapatal a, goal dang lut loin Liverpool an chak.

Slot-a Liverpool

Liverpool-in league match riat an khelhah vawi sarih hnehna an chang ta a, Champions League match hnih leh League Cup match hnih an khelh tawhah an chak ve ve bawk - Slot hi Liverpool coach ni tawh zinga a match hmasa 11-a vawi 10 chak thei hmasa ber a ni.

Reds-in Klopp-a hnuaia 'heavy metal' football kalsanin, game hmuhnawm leh rang, khingpui nawr buan buan kha an thlah hret a, an game a muang hret a, ball an in pass hnem hret a, tlarhnung lam an fimkhur lehzual hret bawk.

Fans ṭhenkhat tan chuan Slot-a style hi hmuhnawm lo zawk ang hialin a sawi theih a, mahse, result a hlawh chhuak thung. Player tin thawhrimna chu fak phu a ni a, Jones a khel ṭha a, Salah pawh a khelh ṭhat loh zan ni mah se goal a khung a, assist a nei tho bawk - kha mah mah khelh ṭhat loh zan!

Liverpool tan inkhel ṭantir lamah Diogo Jota a inhliam a, a titlutu Tosin Adarabioyo-a'n yellow card chiah a hmu. Referee ṭhenkhat chu ni se an hnawt chhuak ang - Jota thlakin Darwin Nunez a lut a, goal khung lo mah se a thawkrim a, Cody Gakpo thlaka Luis Diaz lutte khan Reds squad chhahzia a pholang bawk.

Team thar Chelsea

Chelsea-in Liverpool an hmachhawn hnuhnung vawi 10-ah chak an nei lo a, heng zingah hian Carabao Cup final leh FA Cup final a tel - London club tan chuan Liverpool hi an hnawksak tih loh rual a ni lo.

Enzo Maresca hnuaiah Chelsea an indinthar mek a, Pathianni zanah an game ṭha ber khel chhuak lo mah se, hma an sawn tih hmuh turin a awm - an game-in awmzia a nei a, Anfield-ah Reds an rum ṭhaih fo bawk.

Chelsea fan-te tana lawmna tur langsar chu player man to Moises Caicedo-a'n a theihna ang taka a khel chhuak ta hi a ni ngei ang. Liverpool lakah pawh Caicedo a khel ṭha a, hetihlai hian Cole Palmer erawh a reh hret.

London club-in Anfield-ah hnehna an chang zo lo a, tun season Premier League-a club langsar Manchester City leh Liverpool an hmachhawnah an tlawm ve ve avangin inenfiahna tur an nei a, indinthar mek an nih ang ngeiin siamrem ngai tam tak an la nei.