G.I.G Motors Inter Village Football : Nivia 'Shining Star' hman a ni dawn

G.I.G Motors Inter Village Football Tournament 2024 chu November hian khelh a ni dawn a, inelnaa ball hman tur hi Nivia kut chhuak Shining Star a ni. Shining Star hi tun hmain India rama football inelna sang ber National Football League-ah te hman a ni tawh ṭhin a, Mizoram Premier League-ah pawh hman a ni tawh.

MFA leh Nivia an thawhdun hnuah veng/khua inelnaah pawh Shining Star zel hman chhoh a ni. Mizoram Premier League-ah Nivia dominator hman ni tawh mah se Shining Star hi a man a tlawm zawk a, a tlo zawk avangin mi tin ban phakah a ngaih theih.

Tun ṭum inelnaah hian champion-in nuai hnih leh sial an dawng dawn. Entry fee Rs. 2000 chu October 28, Thawhṭanni tlai dar 4:00 thleng phone number 9862560134-ah GPay hmangin a pek theih a; MFA Office, City Park Aizawl leh LM Store, Bawngkawnah a pek theih bawk.

Tun hian entry fee pe an awm nual tawh a, entry fee pe tawh zingah football thiam veng/khuaa chhal theih Armed Veng, Republic Veng, Durtlang leh Lengpui te an tel a ni.