Ranji Trophy Mizoramin Arunachal Pradesh an hneh; Joseph Thankhum-a'n Century a siam!

India ram chhung a state hrang hrang cricket hmanga inelna sang Ranji Trophy 2024-25 khelh laiah, Mizoram chuan nimin khan Arunachal Pradesh chu run 267-in an hneh.

Gujarat College Cricket Ground A, Ahmedabad-a inkhelah hian Mizoram tan Joseph Lalthankhuma chuan run 128 a siam a, Cricket Association of Mizoram (CAM) team an chak theih nan a thawhhlawk hle a ni.

Joseph Thankhuma chuan, "Pathian min hruaina vang a ni, India ram pum huap inelna huanga hetiang zat run siam ve mai chu awih pawh a harsa hial. Tun ṭuma kan chak theih chhan chu mimal thawhrah a ni lo a, kan team pumpui thawhrimna vang a ni zawk.

"CAM hian zawimuangin hma kan sawn zel a, tun chauh ni loin result ṭha dang neih theih zel pawh kan beisei. Mizo mipuite min ṭawngṭai pui zel turin ka sawm bawk," tiin Vanglaini a hrilh.

Ranji Trophy hi ni khat aia rei khelh ngai (multi days match) a ni a, ṭhum vawra vannei zawk Mizoram hian vuak hmasak an thlang. Thawhkhatnaah (1st innings) run 247 an siam a, hemi ṭum hian hian Mizoram guest player Agni Chopra chuan run 110 siamin, tualchhung player leh CAM Men's Cricketer of the Year ni lai Vikash Kumar, Electric Vengin run 53 a siam bawk.

Arunachal lamin thawhkhatnaah hian run 252 an siam thung. Innings khatnaah hian bowling lamah Joseph Lalthankhuma chu che ṭha berin, Ramhlun Venglai tlangval hian wicket li (4) a la.

Mizoram hian thawhhnihna (2nd innings) pawh an khel ṭha hle, run 404 an siamah wicket hnih chauh an hloh a, 2nd innings hi duhtawk (declare) a ni. Arunachal tan target sang tak run 399 siam tur an tuksak a ni.

A thawhhnihnaah Joseph Lalthankhuma a inlar chhunzawm, Ramhlun Venglai star hian run 128 a vaw chhuak! Joseph-a bakah hian Mizoram guest player Agni Chopra chu a che ṭha leh hle a, run 238 tehmeuh a siam - anni pahnih hi a tawp thlenga damin, Joseph-a leh Chopra te pahnih run siam dun (partnership) hi run 384 niin, Mizoram partnership run record a ni hial.

Innings hnihnaah hian bowling lamah captain Bobby Zothansanga, Chaltlang leh guest player tho KC Cariappa te chuan wicket li (4) ve ve an la a, innings hniha century vawihnih siamtu Mizoram guest player Agni Chopra chu 'Man of the Match' atan thlan a ni.

Mizoram Team-te hian match hnih khel tawhin, vawi khat chakin ṭum khat dang chu an chak lo thung. Ocotober 26, Inrinni hian Manipur nen an khel leh ang.