Agartala-in Santosh Trophy a thleng dawn

78th National Football Championship for Santosh Trophy 2024-25 group D inkhel chu Agartala, Tripura-in a thleng dawn. Group D-ah hian inelna thlengtu Tripura bakah Mizoram, Manipur leh Sikkim te an awm.

Group khat aṭangin team pakhat chauhin final round an lut dawn a, nikum finalist Services leh Goa bakah final round thlengtu tur Telangana te chu an tling tawh.

Group stage hi November 15, Zirtawpni aṭangin Umakanta Mini Stadium-ah khelh a ni dawn a, Mizoramin inlena thlengtu Tripura an hmachhawn nghal ang.

Ni khatah match hnih zel awmin, match leh match inkarah ni khat zel an awm a. Mizoram hian November 17, Pathianniah Manipur an hmachhawn dawn a, he inkhel hian ngaihven a hlawh dawn. Nikum khan Mizoramin semifinal lut mah se, final round group stage-ah Manipur hi 4-1 ngawtin an hneh lo.

Group match hnuhnung ber hi November 19, Thawhlehniah khelh a ni ang a, Mizoramin Sikkim an hmachhawn ang. Mizoram hian nikum khan group stage-ah Sikkim hi 1-0 in an hneh.

Mizoram Football Association chuan Santosh Trophy chungchangah hian meeting a nei tawh a, coaching staff bakah probables squad thlengin thlang tawh mah se puanzar a la ni lo.