Arsenal tan insiamṭhat hun

Chetsual hnua thawh leh nghal theih hi a pawimawh - Arsenal pawhin chutiang tih theih chu an tum ang. Zanin dar 12:30 hian Gunners chuan Champions League khel turin Shakhtar Donetsk an mikhual ang.

Mikel Arteta naute hi kartawp Premier League inkhelah an chesual, team tenau zawk Bournemouth lakah 2-0 in an chak lo. An defender pawimawh William Saliba chu hnawhchhuah a ni.

France international defender hi EPL match khat khel thei lo tura hrem a ni a, zanina European football inelna sang ber erawh a hmachhawn thei ang - Ukrainian club hmachhawn turin Gabriel nen an inkhawp thei dawn.

Gunners hian kar tawpah Premier League hmahruaitu Liverpool an mikhual zui leh dawn bawk a, hei vang hian Arteta pawhin a player a siksawi thiam a ngaiin a rinawm, fimkhur leh fing taka chet a ngai dawn tihna a ni.

League lama chhawr rim loh Gabriel Jesus leh tawnhriat nei ṭha Jorginho ten bul an ṭan a nih pawhin a mak lo ang - forward Gabriel Martinelli leh rawlthar Ethan Nwaneri te pawhin khelhna hmun an chan a rinawm.

North London club hian tun season UCL an match hmasa berah Atalanta chu goal awm loin an inhnehtawkpui a, an match pahnihnaah Paris Saint Germain chu 2-0 in an hneh, tun ṭuma an mikhual tur Shakhtar Donetsk hi chak ni hmel la hmu lo an ni thung.

An sulhnu leh player an neih dan thlir chuan Arsenal hi buk rit zawk tura ngaih an ni - EPL an ngaihpawimawh bawk avangin zaninah an player ṭha ṭhenkhat an hawhchawlhtir a nih pawhin a mak lo ang - captain Martin Odegaard pawh a inlan a la rinawm loh a ni.