Australia ramah Marquez-a pakhatna

Marc Marquez chuan a thiamna leh theihna sang tak a la theihnghilh bik lo a, a vanglai pel deuh tawh mah se bike khalh a la thiam reng - Pathiannia tlan zawh tak Australian Grand Prix-ah hnehna a chang.

Phillip Island Circuit-a intlansiakah Marquez hi rider championship hmahruaitu Jorge Martin hmaah a thleng. Inrinni khan Sprint Race neih niin Martin hi a chak ber a, intlansiak pangngai takah erawh Marquez a chungnung thung a ni.

Kum 26 mi Martin hian hnehna chang lo mah se rider championship hmahruaitu a nihna erawh chu a sawhnghet - amah hnaih bertu Francesco Bagnaia nen an inkarah point 20 a awm.

Champion lai Bagnaia chu pathumnaah a thleng a, hnehna changtu Marquez a phak lohna chu second 10.100 a tling. Marquez hi minute 39 leh 47.702secs chhungin a thleng a ni.

Kum 31 mi Marquez chuan, "A nihna takah chuan corner hmasa ber kha chu a hlauhawmin khawi laiah tak nge ka awm pawh ka hre lo, ka ngaihtuah pawh khan Martin-a tlan pelh mai kha chu thil theih a nih ka ring lo hial.

"Amaherawhchu, mak tak maiin ka beisei aia ṭhain ka tlan chhunzawm a, a tawp lam lap nga vel tlan hmabak kan neih meuh kha chuan nuamti takin ka tlan, ka duh ang takin bike ka khalh thei tawh a ni," tiin a sawi.

Rider championship hmahruai mektu Jorge Martin chuan, "Chawlhkar tawp nuam leh hlimawm tak a ni. Sprint race ka tlan ṭha hle a, intlansiak takah a hmasa ber aṭanga bul ṭanin dawhsanah ka lawn phak bawk.

"Engkim hi duhthusam anga dik thlap vek thei a ni lo a, tuna ka dinhmunah hian ka lawm. Marc khan midang zawng aiin intlansiak a tlan ṭha, chuvangin hnehna chan kha a phu em em a ni," tiin a sawi.

Tun thla tawp hian intlansiak a awm chhunzawm leh nghal dawn. Thailand Grand Prix chu Chang International Circuit-ah an tlan ang, champion tur a la chian loh avangin inelna hmuhnawm tak chawpchhuah leh a ni ngei ang.