Champion zia neitu Manchester City

Premier League champion lai Manchester City-in khelh ṭhat loh niah chak dan an thiam a, Wolverhampton Wanderers lakah goal khata an hnufual hnuin 2-1 in hnehna an chang. City goal hnih hi defender pahnih Joško Gvardiol leh John Stones te khung a ni a, chakna goal hi injury time minute nganaah a lut.

Pep Guardiola hote hi an vannei a tih theih a, champion zia an nei a tih theih bawk. City hian point thum hlu tak an hlawhchhuah avangin point 20 an hmu a, hmahruaitu Liverpool chu point khat chauhin an pha lo.

City an buai

Molineux Stadium-ah Wolves-in bul an ṭan ṭha zawk a, minute sarihna lekah dinglam aṭanga Nelson Semedo cross chu Jorgen Strand Larsen-a'n a khung. City-in ball an chang tam zui a, goal erawh a lut mai lo.

Wolves-in ball chang tlem mah se goal khung theihna hun ṭha an nei a, Semedo-a'n goalkeeper Ederson chauh a hmachhawn hnuah a khung lo. Mualneitu lamin Erling Haaland an ven uluk avangin goal khungna chance a insiam thei lo a, mah se Wolves-in City player-te an veng seng lo. Joško Gvardiol-a'n a hun thawl neih chu remchangah lain minute 33-naah box pawn aṭangin mawi zetin goal kilah a hlai lut.

City player thar Savinho bakah Ruben Diaz ten goal-ah ṭha takin pet mah se Wolves keeper Jose Sa-a'n a dang ve ve. Minute 90 a ral pawhin City-in goal an la khung thei chuang lo.

Chhandamtu Stones

Minute 95-naah City-in corner kick an hmu a, Phil Foden-a'n petin Stones-a'n a tauh goal. Mikhual team-in an goal khung an lawm a, mah se assistant referee-in offside flag a phar a, Spanish manager Pep Guardiola leh a thawhpuite an lungawi lo hlawm hle.

VAR lamin referee Chris Kavanagh chu mual sira monitor hmang turin an ti a, thil thlen dan en hnuah goalkeeper hmaa ding Bernardo Silva chuan keeper Sa a hliah loah a ngai a, goal-ah a pawmsak. Referee vanneihna dawngtu City an lawm a, an khelh ṭhat loh niah point thum an hlawh chhuak.

Manchester City hian October 23, Nilaini zan dar 12:30 hian Champions League group stage-ah Sparta Prague an mikhual ang a, kartawp Premier League inkhelah Southampton an mikhual zui ang.