Goal khung thiam Barcelona an chak

El Clasico atan Barcelona an inbuatsaih ṭha hle - league table chung ber luah chhunzawm turin Pathianni zan khan an chak a, an mikhual Sevilla chu goal khung dan lo hrilhin, 5-1 ngawtin an lo sawp!

Barcelona tan Robert Lewandowski leh Pablo Torre ten goal hnih ve ve an khung a, Pedri chuan goal khat a thawh ve bawk. Sevilla tan Stanis Idumbo chuan goal khat khung ve mah se, goal a khung hian goal li an chhuah fel tawh a, an tan a harsa tawh.

Hansi Flick-a hnuaia harhtharna chang Barcelona hian league match 10 aṭanga point 27 hmuin table chung ber an luah a, anmahni hnaih bertu Real Madrid aiin point thumin an sang zawk.

Barcelona hian Nilaini zanah Champions League khel turin Bayern Munich an mikhual ang a, kartawp La Liga inkhelah Real Madrid an lenchilh zui dawn - hei hi mipui hmuh châk tur a ni.

Barca an hriam

Catalan club-in mikhual Sevilla lakah zahngaihna an lantir lo a, chawlhlawk hman a nih hian 3-0 in hma an hruai tawh. Barca hian match thum zet chu a zawnin half time-ah si thum faiin hma an hruai ta a, goal khung an harsat lohzia kan hmu nawn.

Barcelona hian minute 24-naah goal an khung ṭan. Peque Fernandez chuan Raphinha a titlu a, Brazilian forward hian penalty a hlawh chhuak - a pet turin Lewy a lo pen chhuak a, Polish striker hian goal-a chantir turin harsatna a tawk lo.

Minute li a liam awrh a, Barca bawkin goal an khung nawn - box bul aṭangin Pedri chuan goal mawi bik a khung a, 2-0 a ni der. An la duhtawk lo cheu! Lewy bawk a inlar a, penalty hlawh chhuaktu Raphinha siamsak chu an goal thumna ni turin a khung.

Minute 45 pawh an khelh tlin hmain chak tur a chiang tawh tiin a sawi theih a, Sevilla-in Barcelona khelmualah Flick-a naute goal khung lai an thlir.

Hmel thar Torre

Barcelona-in second half-ah goal hnih an khung belh a, a khungtu chu hriat hlawh lo Torre a ni - kum 21 mi attacking midfielder hian minute 76-naah Lamine Yamal thlak chauh mah se, goal hnih khung turin hun a la nei.

Torre hian minute 82-naah an goal lina a khung a, Sevilla tan Idumbo chuan minute 87-naah khung ve zuk mah se, a hnu minute khat lawkah Torre hian khung belh lehin Barcelona an chak chiang hle.

Spain Under-21 international Torre hian season hmasa kha Girona-ah loan-in a khel a, Barca a kir leh meuh chuan a puitling ta hle. Tun season-a league match nga a khelhna niin, goal thum a khungna chiah a ni a, assist vawi khat a nei tawh bawk.

Barcelona hmabak a êng tih loh rual a ni lo a, Pathianni zana inkhel bul ṭan zinga player panga chu kum 21 hnuai lam vek an ni - Pedri, Alejandro Balde leh Ansu Fati te chu kum 21 mi vek an ni a, kum 17 mi Lamine Yamal leh Pau Cubarsí ten bul an ṭan vek.

Lewy a vul

Barca an chak a, goal nga an khung bawk. Hemi piahlamah hian Catalan club-in lawmna tur an nei a, minute 83-naah Pedri thlakin Gavi a lut - thla 11 zet khup hliam vangin Gavi hi a chawl tawh a, Barca tan a lo kir hi lawma zuan tawr tawrna tham a ni!

Catalan club player naupang tak tak kara langsar bera chhal ngam erawh Lewy bawk a ni. Kum 36 mi striker hian goal hnih a khung a, tun season inelna hrang hrangah match 12 khelin goal 14 a khung tawh a, a match hnuhnung parukah goal 10 a khung ta.

November pawh thlen hmaa Lewy-a goal khung zat hi striker pangngai takin season khata a goal khung zat a tling tawh a, a kum nena ngaihtuah phei chuan Polish striker sulhnu hi sawi nep theih a ni mawlh lo.

Lewy hian Tottenham Hotspur legend Jimmy Greaves (366 goals) nih rualin, European top five league-a goal khung tam pathumna a ni a, a chungah hian Cristiano Ronaldo (495) leh Lionel Messi (496) an awm.