Conte enkawl Napoli an kal zel
Antonio Conte kaihhruaina hnuaiah Napoli chuan Serie A hma an hruai zel a, an hnungah champion lai Inter Milan chuan tha thlah loin an um ve zel bawk - Italian champion nih tuma inum boruak a sang chho dawn hle.
Pathianni zan tir khan Napoli hian Empoli an len chilh a, second half-ah Khicha Kvaratskhelia chuan penalty aṭangin goal awmchhun a khung, khualmualah Naples club hi 1-0 in an chak.
Napoli manager Conte chuan, "A nihna takah chuan a tir lamah kha chuan kan khel chhe zawk, first hlaf chhung kha chu kan khingpuite inkhel kan en a ni ringawt, inkhelh hmaa ka ruahmannate kha engmah ka hmu lo.
"Ka naute an hlauthawng tih ka hria a, chawlhlawk laia inrintawkna tuhsak kha ka hna a ni. Empoli khelmual hi midang pawhin inkhelh harsatna hmun tiin an sawi ṭhin, chumi hmuna hnehna kan chang thei hi ka lawm," a ti.
Napoli hian Serie A match riat aṭanga point 19 hmuin hma an hruai chhunzawm a, an hnuaia awm Inter Milan nen an inkarah point hnih a awm - match khat chetsual lekah an dinhmun a la inthlak danglam daih thei.
An elpui leh an chunga awm mek ni bawk Napoli an chak tih hre sa chungin Inter Milan an inlan a, an chesual duh bik lo. Inter hian an striker ṭha Lautaro Martinez-a goal khat hmangin AS Roma chu 1-0 in an hneh.
Point thum an hmuh avangin an lawm a, chutihrualin an player ṭha pahnih Hakan Calhanoglu leh Francesco Acerbi te chu hliam vanga thlak an ngai, an chawlh chen tur erawh sawi lawk theih a la ni lo thung.
Tun hnaiah Inter hian match khelh tur an ngah, ni 21 chhungin match sarih an khelh a ngai dawn. Serie A bakah hian Champions League, Italian Cup leh Italian Super Cup bakah Club World Cup atan an tling tawh bawk.
Inter Milan president Giuseppe Marotta chuan, "Match a tam em em mai a, player an rim hle bawk. Club dang pawhin kan harsatna tawh ang hi an tawk ve thei tho bawk a, thuneitu lamin an tih tlem si loh avangin insiamrem kan ngai ang," a ti.
Pathianni zan inkhel dangah Fiorentina chuan Lecce chu 6-0 in an sawp. Kum 1966 hnuah Fiorentina hian khualmuala Serie A match an khelh hoah a vawi khat nan goal ruk an khung tling leh ta chiah a ni.